Samaradakı Kuybışev Neft Emalı Zavodu dron hücumundan sonra fəaliyyətini dayandırıb

11:27

Bəyəndim (0) Bəyənmədim (0)

Avqustun 28-də Rusiyanın Samara şəhərindəki Kuybışev Neft Emalı Zavoduna pilotsuz təyyarələr hücum edib. Nəticədə neft emalı zavodu fəaliyyətini dayandırıb. Bu barədə RBC-Ukrayna Rusiyanın ASTRA nəşrinə istinadən məlumat yayıb.

Ən azı 29 dronun müəssisəyə hücum etdiyi bildirilir.

Yerli hakimiyyət orqanları neft emalı zavoduna hücumu təsdiqləməyib, hücumun dəf edildiyini və yanğının tez bir zamanda söndürüldüyünü bildirib, dəqiq nəyin yandığını açıqlamayıb.

Rusiya Fövqəladə Hallar Nazirliyindəki ASTRA mənbələrinin məlumatına görə, kütləvi hücumdan sonra zavodda ən azı yeddi yanğın baş verib. Avqustun 28-dən zavod fəaliyyətini tamamilə dayandırıb.

Qeyd olunur ki, pilotsuz təyyarələrdən biri AVT-4 ilkin neft emalı qurğusuna düşüb və o, alovlanıb. Pilotsuz təyyarə mayeləşdirilmiş qaz keçidinə də dəyib, sonradan o da alovlanıb.

Bundan əlavə, Kuybışev Neft Emalı Zavodunda dronların qaz kəmərinə, benzin kəmərinə, AVT-5 qurğusuna, hidrogen istehsalı qurğusuna və dizel yanacağı çənlərinə dəyməsi qeydə alınıb.

Əziz Mustafa