Özbəkistandan Avropaya ixrac 2,3 milyard dollara qədər artıb

Özbəkistandan Avropaya ixrac 2,3 milyard dollara qədər artıb. Bu barədə Özbəkistan Prezidenti Şavkat Mirziyayev səfirlərlə görüşündə bildirib. O bu istiqamətdə İraq, Fransa və Afrika ölkələrini Özbəkistan malları üçün perspektivli istiqamətlər adlandırılıb.

Bununla belə Mirziyayev Avropaya ixracın 2,3 milyard dollara qədər artmasına baxmayaraq, səfirlərin bir sıra bazarlarda Özbəkistan məhsullarını tanıtmaq üçün kifayət qədər səy göstərməməsinə diqqət çəkib.

O qeyd edib ki,səfirlər xarici investorlar və iri şirkətlərlə fəal şəkildə əlaqə saxlasalar, Özbəkistan ixracı əhəmiyyətli dərəcədə artıra biləcək.

Mirziyayev buna nümunə kimi İraqı göstərib - yerli istehsalın demək olar ki, olmadığı və daxili bazarını doyurmaq üçün hər il təxminən 100 milyard dollar dəyərində məhsul idxal edən bir ölkə.

Dövlət başçısı İraqdan 150 iri şirkətin Özbəkistana dəvət olunmasını yüksək qiymətləndirib.

"Bu şirkətlərin nümayəndələri yerli müəssisələrin fəaliyyəti ilə tanış olduqdan sonra əvvəllər Özbəkistan məhsulları haqqında demək olar ki, heç bir məlumata malik olmadıqlarını bildiriblər. Onlar İraqda Özbəkistan şirkətləri üçün rəsmi distribyutor mərkəzləri açmağı və Yaxın Şərq bazarlarına fəal şəkildə daxil olmağı planlaşdırırlar", - deyə bəyanatda bildirilir.

Danışıqlardan sonra bu il İraqa "yüz milyonlarla dollar dəyərində" məhsul tədarük etmək barədə razılıq əldə edilib.

Prezident Özbəkistan səfirlərinin Vyetnam, Bəhreyn və Portuqaliya ilə oxşar model üzrə işləməli, tərəfdaşlar tapmalı və yerli istehsalçıların bu bazarlara çıxışını asanlaşdırmalı olduqlarını qeyd etdi.

Bundan əlavə, ötən il Avropaya ixrac 23% artaraq 2,3 milyard dollara çatıb. Bununla belə, bir sıra Avropa ölkələrindəki səfirlərin hələ də Özbəkistan brendinin təşviqində kifayət qədər nəticə göstərmədiyi qeyd edilib.

Şavkat Mirziyoyev bildirib ki, Fransa Özbəkistanın kimya sənayesi üçün yeni ixrac məkanına çevrilə bilər və Fərqanə, Nəvai, Kaşkadərya və Daşkənd bölgələrindəki müəssisələr üçün əsas bazarı təmsil edir.

Xarici nümayəndəliyə Fransa gübrə bazarının tələblərini və standartlarını öyrənmək, bu məlumatı müvafiq şirkətlərə yaymaq və şirkət rəhbərlərini və onların məhsullarını nümayiş etdirən sərgilər təşkil etmək tapşırılıb.

Ümumiyyətlə, kənd təsərrüfatı inkişaf etmiş Avropa ölkələrinə mineral gübrə ixracını artırmaq üçün ayrıca bir proqram hazırlamaq vəzifəsi qoyulub.

Kənd təsərrüfatına xüsusi diqqət yetirilib. İqlim dəyişikliyi və su çatışmazlığı ilə üzləşən İspaniya kənd təsərrüfatı sektorunda əhəmiyyətli irəliləyişlər əldə edir. Xüsusilə, Almeriya bölgəsində 30.000 hektardan çox ərazini əhatə edən vahid istixana kompleksi yaradılıb və təxminən 1,5 milyard avro vergi gəliri əldə edilib. Bu istixanalar günəş enerjisi ilə işləyir və qazdan istifadə etmir.

Özbəkistanın İspaniyadakı səfirinə ölkənin qabaqcıl kənd təsərrüfatı təcrübələrini və texnologiyalarını Surxandərya və Kaşkadərya bölgələrinə tətbiq etmək üçün bir proqram hazırlamaq tapşırılıb.

Niderland dünyanın ən yaxşı üç kənd təsərrüfatı ixracatçısından biridir. 100-dən çox istixana şirkətini bir araya gətirən innovativ və təhsil mərkəzi olan Dünya Horti Mərkəzi hər il dünyanın hər yerindən 40.000-dən çox mütəxəssisə ev sahibliyi edir.

Özbəkistanın Belçikadakı səfirinə ən azı 100 özbək mütəxəssisinin mərkəzə səfərini təşkil etmək tapşırılıb.

Bu il Misir təcrübəsinə əsaslanaraq, Kitab rayonundakı 5 hektar ərazidən 100 ton "super-super elit" toxum kartofu yığılıb. Özbəkistanın Misirdəki səfirinin rəhbərliyi ilə aparılan danışıqlardan sonra Misir investorları bu layihəni 1000 hektara qədər genişləndirmək istəklərini bildirdilər.

Bundan əlavə, Misir şirkəti Tuprok-Kala rayonunda 2000 hektar səhra ərazisinin inkişaf etdirilməsini və pivot suvarma sistemlərinin istehsalını qurmağı təklif etdi.

Digər böyük şirkət Özbəkistanda hepatit C dərmanının istehsalını qurmaq niyyətində olduğunu açıqladı.

Məsul qurumlara və vəzifəli şəxslərə bu layihələrin praktiki həyata keçirilməsinə başlamaq tapşırılıb.

Mirziyoyev Özbəkistanın 50-dən çox ölkəni birləşdirən və təxminən 3 trilyon dollar dəyərində iqtisadiyyata malik yeni ixrac məkanı hesab edilən Afrika qitəsi ilə ticarət və iqtisadi əməkdaşlığı daha fəal şəkildə inkişaf etdirməsinin vacibliyini vurğuladı.

Xarici İşlər, İnvestisiya, Sənaye və Ticarət nazirliklərinə, eləcə də Özbəkistanın Misir və Qətərdəki səfirlərinə Afrika ölkələri ilə əməkdaşlığın inkişafı üçün müvafiq yol xəritəsini təsdiqləmək tapşırılıb.

Əziz MUSTAFA