İsveç Rusiyaya casusluq etməkdə şübhəli bilinən bir nəfəri həbs edib

İsveç hüquq-mühafizə orqanları ötən həftə Rusiyaya casusluq etməkdə şübhəli bilinən bir İsveç vətəndaşını həbs etdi. Mediada yayılan məlumatlara görə, casusun cinayətləri 2023-cü ildən başlayaraq törətdiyi iddia edilir və bəzi hərəkətlər 2022-ci ilin əvvəllərində baş verə bilər. Bu barədə Dagens Nyheter məlumat verib.

Saxlanılan şəxs 2022-ci ilə qədər İsveç Silahlı Qüvvələrində İT məsləhətçisi kimi çalışıb. Daha sonra o, özəl İT şirkətində texniki dəstək sahəsində çalışıb, daxili təhlükəsizlik məsələlərini həll edib, kibertəhdidlərin qiymətləndirilməsində iştirak edib və vacib infrastruktur proseslərini dəstəkləyib. İT şirkətinin müştərilərindən biri İsveçin əsas media qurumlarını - Dagens Nyheter, Expressen və Dagens Industri-ni nəşr edən Bonnier nəşriyyat qrupu idi.

Nəşrin məlumatına görə, həmin şəxs həmçinin İsveç Ombudsmanına bir neçə şikayət ərizəsi ilə müraciət edib və sui-qəsd nəzəriyyələri yayan veb saytlarla əlaqəli olub. Şübhəli bütün ittihamları rədd edərək günahsız olduğunu bildirib. O, hələ də həbsdədir, İsveç hakimiyyəti isə bütün halları və xarici kəşfiyyatla mümkün əlaqəni aydınlaşdırmaq üçün istintaqı davam etdirir.

Əziz MUSTAFA