Tramp administrasiyası ABŞ Milli Elm Şurasının bütün üzvlərini işdən çıxarıb

Prezident Donald Trampın administrasiyası elmin istiqamətini müəyyən edən və Milli Elm Fondunun işinə nəzarət edən məsləhət orqanı olan ABŞ Milli Elm Şurasının bütün 22 üzvünü işdən çıxarıb. ArsTechnica-nın məlumatına görə, qərar şura üzvlərinə heç bir izahat verilmədən qısa bir e-poçt vasitəsilə çatdırılıb
Elanda bildirilirdi ki, onların səlahiyyətləri prezident tərəfindən "dərhal" xitam verilib. Bu, görünməmiş bir addım idi, çünki şura üzvləri adətən altı illik müddətə təyin olunur və davamlılığı təmin etmək üçün üst-üstə düşən müddətlər tətbiq olunur.

Qərb mediasının məlumatına görə, vəzifədən azad etmə 5 may tarixinə planlaşdırılan şura iclası ərəfəsində baş verib. Həmin iclasda ABŞ-ın Çin qarşısında elmi mövqeyini itirməsi ilə bağlı hesabat təqdim olunacaq. Keçmiş üzvlərdən biri, professor Kevan Stassun bu qərarı "elm və texnologiya sahəsində Amerika liderliyinin tamamilə dağıdılması" adlandırıb.

Administrasiya əvvəllər Milli Elm Fondunun büdcəsini yarıdan çox azaltmağı, yüzlərlə qrantı ləğv etməyi və işçi heyətini azaltmağı təklif etmişdi. Tramp tərəfindən təyin edilmiş fondun direktoru da bu dəyişikliklər fonunda istefa verib.

Bəzi analitiklər vəzifədən azad etmənin administrasiyanın siyasətinə sadiq yeni bir şura yaratmaq niyyəti ilə əlaqəli ola biləcəyini ehtimal edirlər. Oxşar addımlar artıq digər strukturlarda, xüsusən də ABŞ hökuməti daxilində səhiyyə və elmi məsləhət xidmətləri sahələrində qeydə alınıb.

Xatırladaq ki, əvvəllər Trampın elm maliyyələşdirməsini son 35 ildə ən aşağı səviyyəyə endirdiyi bildirilirdi.

Əziz MUSTAFA