İtaliyanın Özbəkistandakı keçmiş səfiri ruslara qanunsuz viza verməkdə ittiham olunur

İtaliyanın Özbəkistandakı keçmiş səfiri Piergabriele Papadia de Bottini di Sant'Agnese İtaliyada həbs edilib. O, Şengen zonasına giriş qaydalarını pozaraq ruslara qanunsuz olaraq turist vizası verməkdə ittiham olunur, La Repubblica xəbər verir.

Piergabriele Papadia de Bottini di Sant'Agnese 2024-cü ilin dekabrında İtaliyanın Özbəkistandakı səfiri oldu. O, əvvəllər Moskvadakı İtaliya konsulluğunda çalışmış İtaliya vətəndaşlığı olan rusiyalı Tatyana Tarakanovanı viza şöbəsinin müdiri təyin edib.

Müstəntiqlərin sözlərinə görə, səfir və onun köməkçisi Şengen zonasına giriş tələblərinə cavab verməyən rusiyalılara üç ilə qədər uzunmüddətli turist vizalarının verilməsini təsdiqləyiblər. Bu məqsədlə müraciət edənlərdən adambaşına 4000 ilə 16000 avro arasında pul alınıb. Ən azı 95 rusiyalı bu yolla İtaliyaya daxil olub.

Vizaları Özbəkistanda yaşamayan, konsulluqda şəxsən olmayan və ya başqasının imzası ilə sənədlər təqdim edən rusiyalılar əldə ediblər. İtaliya prokurorluğu iddia edir ki, Rusiya turizm agentlikləri Happy Travel, Visa4you və Park Lane bu sxemdə iştirak ediblər.

İstintaq 2025-ci ilin iyul ayında, İtaliya Xarici İşlər Nazirliyinin müfəttişliyinin səfirliyə baş çəkməsindən sonra başlayıb. Tatyana Tarakanova və Piergabriele Papadia de Bottini di Sant'Agnese qanunsuz immiqrasiyaya kömək və korrupsiya ittihamları ilə Roma prokurorluğu tərəfindən istintaq altındadırlar. Səfir 2025-ci ilin dekabrında vəzifəsindən azad edilib. 7 mayda istintaq davam edənə qədər həbs edilib.

Əziz MUSTAFA