Cənubi Koreya əsgər çatışmazlığı səbəbindən Hyundai robotları və süni intellektlə ordusunu gücləndirmək istəyir

Cənubi Koreya Hyundai robotlarından hərbi məqsədlər üçün istifadə etmək imkanını ciddi şəkildə nəzərdən keçirir. Oxuməni.az xəbər verir ki, bu barədə “Bloomberg” yazır. Hakimiyyətin planları ordunun sayının azaldılması ilə bağlıdır.
Respublikanın Müdafiə Nazirliyi “Bloomberg”-ə təsdiqləyib ki, "döyüş şəraitinin dəyişməsinə cavab vermək və 'yüksək texnologiyalı, elmlə təchiz olunmuş silahlı qüvvələr' formalaşdırmaq səyləri çərçivəsində Hyundai Motor ilə əməkdaşlıq barədə danışıqlar aparılır". Konkret detallar hələ razılaşdırılmayıb, Hyundai isə şərh verməkdən imtina edib.
Səbəb demoqrafiyadır. Son altı ildə ölkənin fəal silahlı qüvvələrinin sayı rekord dərəcədə aşağı doğuş səviyyəsi fonunda 20% azalaraq 450 min nəfərə düşüb.
Cənubi Koreya Müdafiə Nazirliyi 2040-cı ilə qədər bu rəqəmin daha da azalaraq 350 min nəfərə enəcəyini proqnozlaşdırır. Eyni zamanda, Şimali Koreya nüvə və raket təhdidlərini artırmağa davam edir. Seul bu vəziyyətdən şəxsi heyətin sayına əsaslanan ordudan texnologiyaya əsaslanan orduya keçidlə çıxış yolu axtarır.
“Korea Economic Daily”-nin məlumatına görə, hazırda hakimiyyət artıq konkret texnikaları nəzərdən keçirir: Boston Dynamics (Hyundai-yə məxsus) şirkətinin dörd ayaqlı Spot robotu, dörd təkərli MobED mobil droidi və geyilə bilən X-ble Shoulder ekzoskeleti.
İlk mərhələdə robotların döyüş deyil, köməkçi tapşırıqlarda, yəni müşahidə, kəşfiyyat və logistika üçün istifadə edilməsi planlaşdırılır.
Spot robotu ABŞ prezidenti Donald Trampın iqamətgahı Mar-a-Lago-da patrul edərkən artıq diqqət çəkmişdi. Lakin “Bloomberg” vurğulayır ki, eyni texnikanın Koreya yarımadasındakı demilitarizasiya zonasında yerləşdirilməsi tamamilə fərqli bir simvol olardı.
Almaz Həsənli