Polşada 1500 NATO əsgərinin iştirak etdiyi təlimlər keçiriləcək

Böyük Britaniya, Almaniya və Fransadan olan qoşun kontingentləri "İstəklilər Koalisiyası" təlimlərində iştirak etmək üçün Polşaya gələcək.

Oxuməni.az xəbər verir ki, "Britaniyanın The Times qəzetinin məlumatına görə, bu ilin noyabr ayında Polşada keçiriləcək hərbi təlimlərdə bir neçə Avropa ölkəsindən - əsasən Böyük Britaniyadan - ən azı 1500 əsgər iştirak edəcək. Bu tədbirlər atəşkəs razılaşmasından sonra Ukraynadakı vəziyyəti sabitləşdirmək üçün potensial missiyaya Britaniya, Almaniya və Fransa qoşunlarını hazırlamaq üçün nəzərdə tutulub", - deyə nəşr bildirib.

"Bu manevrlər çoxmillətli əməliyyatlarda sürətli yerləşdirmə imkanlarını, logistikanı və komandanlıq koordinasiyasını sınaqdan keçirəcək. Məqsəd həmçinin müxtəlif ölkələrdən olan bölmələr arasında əməkdaşlığı gücləndirməkdir", - deyə nəşr əlavə edib.

Bildirilir ki, "təlimlər "İstəklilər Koalisiyası"nın fəaliyyəti ilə əlaqələndirilir". "İstəklilər Koalisiyası" Birləşmiş Krallıq, Fransa, Almaniya, Kanada, Avstraliya, Baltikyanı ölkələr, Polşa, Sloveniya, İtaliya, İspaniya, Danimarka, İsveç, Finlandiya və digər ölkələri (cəmi 30-dan çox ölkə) əhatə edən beynəlxalq ittifaqdır. Koalisiya 2025-ci ilin mart ayında Ukraynaya uzunmüddətli hərbi və strateji dəstək vermək üçün yaradılıb.

Əziz MUSTAFA