G20 Liderlərinin Zirvə Toplantısı başa çatıb

Oxumənı.az “Anadolu”-ya istinadən xəbər verir ki, Cənubi Afrikanın Yohannesburq şəhərində G20 Liderlərinin Zirvə Toplantısı başa çatıb.
Zirvə Toplantısı 22-23 noyabr tarixlərində "Həmrəylik, Bərabərlik və Davamlı İnkişaf" mövzusu altında keçirildi. Qlobal iqtisadi məhsulun təxminən 85%-ni, beynəlxalq ticarətin 75%-ni və planet əhalisinin üçdə ikisini təmsil edən ölkələrin liderləri üç işçi sessiya keçiriblər. Onlar qlobal iqtisadiyyatın gələcəyinə təsir edəcək islahatları müzakirə ediblər.
Birinci sessiya qlobal maliyyə arxitekturasının gücləndirilməsi, tənəzzülün və proteksionizmin qarşısının alınması və qlobal iqtisadiyyatın davamlı böyüməyə keçidi üçün tədbirlərə yönəldildi.
İkinci sessiyada fəlakət risklərinin azaldılması, iqlim dəyişikliyi ilə mübarizə, ədalətli enerji keçidinin təmin edilməsi və qida sistemlərinin gücləndirilməsi məsələləri müzakirə edildi. Görüşdən sonra liderlər şam yeməyində fikir mübadiləsi apardılar.
Üçüncü sessiyada qlobal iqtisadiyyat üçün vacib olan mineralların çıxarılması və ticarəti, eləcə də süni intellektin inkişafı ilə bağlı məsələlər müzakirə edildi.
G20 19 ölkənin və iki regional qrupun - Avropa Birliyi və Afrika Birliyinin forumudur.
Zirvə görüşünün əsas nəticələrindən biri ABŞ-ın etirazlarına baxmayaraq, Yekun Kommunikenin qəbul edilməsi oldu. ABŞ Prezidenti Donald Tramp Cənubi Afrika hökumətini ağdərili azlığa qarşı "irqi ayrı-seçkilikdə" günahlandıraraq sammitdə iştirak etməkdən imtina etdi.
Sənəddə silahlı münaqişələrə son qoyulmasının, iqlim tədbirləri üçün maliyyələşdirmənin genişləndirilməsinin və Afrikanın inkişafına diqqətin artırılmasının vacibliyi vurğulanır. İlk dəfə olaraq Fələstin digər böhranlarla eyni nəfəsdə xatırlandı.
İştirakçılar Paris Sazişinin məqsədlərini bir daha təsdiqlədilər və inkişaf etməkdə olan ölkələrdə iqlim tədbirlərinə trilyonlarla dollara qədər investisiya qoyuluşunun artırılmasına çağırdılar.
Almaz Həsənli