ABŞ-da 30-dan çox avtomobil qəzaya uğrayıb

Güclü külək zamanı Koloradoda 30-dan çox avtomobilin iştirak etdiyi böyük qəza baş verib. Bu barədə The New York Post qəzeti məlumat yayıb.

Nəşr ştat polisinə istinadən bildirir ki, dünən, 17 fevralda Pueblo yaxınlığındakı yolda böyük yol qəzası baş verib. Qəzaya bir neçə yük maşını, heyvan qoşquları olan pikap və minik avtomobilləri cəlb olunub.

Kolorado Ştat Yol Patrul Xidmətinin mayoru Brayan Lyonsun sözlərinə görə, müxtəlif nəqliyyat vasitələrində olan dörd nəfərin öldüyü təsdiqlənib. Daha azı 29 nəfər müxtəlif dərəcəli xəsarətlərlə yerli xəstəxanalara aparılıb.

30 avtomobilin toqquşması əlverişsiz hava şəraitində, o cümlədən toz qaldıran və təhlükəli sürücülük şəraiti yaradan güclü küləklər səbəbindən baş verib və yolda qismən elektrik kəsintilərinə səbəb olub.

"Görünmə məsafəsi demək olar ki, sıfır idi", - deyə Lyons bildirib.

Nəqliyyat vasitələrindən birində 32 keçi olan qoşqu da olub: onlardan dördü ölüb, qalanları isə təhlükəsiz şəkildə təxliyə edilib.

Hazırda qəzanın səbəblərini müəyyən etmək üçün araşdırma aparılır.

Əziz Mustafa