Səbail Rayon Məhkəməsində "Bulaq" restoranında baş verən atışma zamanı yaralanan Fuad Əsgərov barəsində 4 aylıq həbs-qətimkan tədbiri seçilib.

Bu barədə saytına Fuad Əsgərovun vəkili Ceyhun Yusifov məlumat verib. Vəkil müdafiə etdiyi şəxsin həbsinin əsassız olduğunu, hadisə zamanı zərər çəkdiyini, dörd güllə yarası aldığını deyib.

Hadisə aprelin 20-də Səbail rayonunun Badamdar qəsəbəsində yerləşən "Bulaq" restoranında baş verib. Hadisə zamanı Fuad Əkbərov və Bəhruz Rəfiyev tapançadan açılan atəş nəticəsində yaralanıb, 30 yaşlı Süleyman Abdullayev isə bıçaqlanıb. Hər iki yaralı xəstəxanaya yerləşdirilib. Hüquq mühafizə orqanlarına hadisə haqda ABŞ-ın Bakıdakı səfirinin müavini Derek Hoqan məlumat verib. Açılan atəşlərdən biri səfir müavinin istifadəsində olan maşınına dəyib.

Polis və prokurorluq orqanları əməkdaşlarının həyata keçirdikləri əməliyyat-axtarış tədbirləri nəticəsində paytaxt sakinləri Tofiq Qaramizadə, Hüseyn Hüseynov və B.Rəfiyev tutulub. Faktla bağlı Bakı şəhər Prokurorluğunda Cinayət Məcəlləsinin 29,120-ci (qəsdən adam öldürməyə cəhd) və 221.2.1-ci (xuliqanlıq, bir qrup şəxs tərəfindən və ya təkrar törədildikdə) maddələri ilə cinayət işi başlanıb.

İnarə Rafiqqızı