Avropanı qorxutmaq... - TVP1 portalı “Qərb-2021” təliminin məqsədini açıqladı
"“Qərb-2021” təlimi Rusiya üçün yalnız hərbi bacarıqlar öyrətməkdən daha çox şey deməkdir. Rusiya bunu təşkil etməklə Mərkəzi Avropa ölkələrində qorxu yaratmaq və NATO-nu bu bölgəyə müdaxilə etməkdən çəkindirmək istəyir. Moskva hərbi üstünlüyünü gizlətmir və bundan siyasi məqsədlər üçün də istifadə edə bilər”.
Oxuməni.az xəbər verir ki, bu barədə TVP1 portalında jurnalist Petar Petroviç yazır.
Bir neçə gün sonra, daha dəqiq sentyabrın 10-da Rusiyanın qərb hissəsində, o cümlədən Kalininqrad bölgəsindəki Polşa ilə sərhəddə və Belarusda 2009-cu ildə əsası qoyulandan bəri ən genişmiqyaslı “Qərb-2021” hərbi təlimləri başlayacaq.
Jurnalist Rusiya və Belarus tərəflərinin bütün bəyanatlarının əksinə olaraq, bu təlimlərin qətiyyən müdafiə xarakteri daşımadığına diqqəti çəkir: “Təcavüzkar damğası yenə Polşaya vurulacaq. Üstəlik, Polşa-Belarus sərhədində miqrantlarla bağlı yaranmış gərgin vəziyyət odun üstünə yağ tökəcək və Polşa hökuməti vəziyyətin təhlükəli və ciddi olduğunu yaxşı anlayır”.
Polşa Rusiyanın son illərdə fəal şəkildə gücləndirdiyi və bununla da Baltik dənizindəki potensialını artırdığı Kalininqrad bölgəsi ilə birbaşa həmsərhəd olmasına baxmayaraq, daha çox Belarus ərazisində keçiriləcək təlimlərdən narahatdır.
Polşa Müdafiə nazirinin müavini Marçin Oçepa “Radio Zet”ə açıqlamasında budəfəki hərbi təlimlərin Rusiyanın iddia etdiyindən daha geniş miqyaslı və misilsiz olacağına əmindir: “Eyni zamanda görürük ki, bu rejimlər başqa bir silahdan - canlı insandan istifadə etməyə qərar veriblər”.
Marçin Oçepa hesab edir ki, Moskva və Minsk, qaçqın və ya sadəcə iqtisadi mühacir olmasından asılı olmayaraq, miqrantları Qərb ölkələrinə qarşı çevirməyə çalışırlar. Polşalılar ilk dəfə bu iki faktorun üst-üstə düşəcəyi bir vəziyyətin şahidi olacaq. Məhz bu amili nəzərə alan səlahiyyətlilər eyni zamanda AB və NATO-nun xarici sərhədi olan Polşanın şərq sərhədində təxribatları istisna etmirlər.
Öz növbəsində Şimali Atlantik Alyansı özü NATO ölkələrinin sərhədlərini “təsadüfən” keçmək faktlarıyla dolu olan vəziyyətin inkişafını yaxından izləyir. Baş katib Yens Stoltenberq vurğulayıb ki, Rusiya öhdəliklərinə uyğun olaraq Rusiya-Belarus təlimlərində iştirak edən hərbçilərin sayı ilə bağlı faktiki məlumatlar, həmçinin Vyana konvensiyasının müddəalarına uyğun olaraq ATƏT missiyasının orada iştirakına razılıq verməlidir.
Şərq Araşdırmaları Mərkəzinin hesabatında ekspertlər Andjey Vilk və Petr Loxovski keçən ilin sonunda Rusiyanın guya özünü və Belarusu NATO-nun artan təcavüzündən qorumaq məcburiyyətində qaldığı dezinformasiya kampaniyalarına başladığına diqqəti çəkir: “Eyni zamanda, Rusiya hərbi baxımdan üstünlüyə malik olduğunu və gücündən siyasi məqsədlər üçün istifadə etməkdən çəkinmədiyini açıq şəkildə göstərmək istəyir”.
Ekspert Yaroslav Çislak hesab edir ki, hərbi baxımdan Belarusun müstəqil silahlı qüvvələri Polşa ordusu və bütövlükdə Polşa üçün heç bir potensial təhlükə yaratmır. Daha doğrusu, o, Belarusu Rusiya ordusu üçün tranzit ölkə kimi qəbul edir.
“Təlimlərdə, miqyasından asılı olmayaraq, bölmələrin və əsgərlərin sayı, yalnız onların hərəkətinin effektivliyi və arxa cəbhənin dəstəyi nəzərə alınır. Belarusda hələ də istifadə edilən bir çox postsovet material-texniki baza var” - deyən ekspert hər iki ölkədə eyni genişlikdə olan dəmir yolu relslərinin hərbi qatarların hərəkətini asanlaşdırdığına diqqəti çəkir. Onun fikrincə, Polşa ərazisindəki istənilən obyekti vura bilən “İsgəndər” raketlərinin olduğu Kalininqrad bölgəsindəki vəziyyəti də fəal şəkildə izləmək lazımdır.
Məqalənin müəllifi Petar Petroviç mütəxəssislərin fikirləri ilə razılaşır ki, Rusiyanın bu təlimlərdə güddüyü məqsəd təkcə hərəkət və logistikanı yaxşılaşdırmaq deyil: “O, Mərkəzi Avropa ölkələrində qorxu, təhlükə hissi yaratmağa və NATO-nu şərq cinahında fəal iştirakdan çəkindirməyə çalışır. Ancaq bu vəziyyətdə Şimali Atlantik Alyansı əks istiqamətdə hərəkət etməli və şərq sərhədlərində mövqelərini daha da gücləndirməlidir, çünki Moskva yalnız uzun illərdir ünsiyyət qurduğu güc dilini başa düşür”, - deyə jurnalist şərhini yekunlaşdırır.
