Şimali Kipr sahillərində bərə batdı: 7 nəfər həlak olub
Şimali Kipr Türk Respublikasında (ŞKTR) yerləşən Girnə limanı yaxınlığında bazar günü 259 sərnişin və səkkiz ekipaj üzvü olan "Filojet" bərə-katamaranı çevrilərək qəzaya uğrayıb. Oxuməni.az "Reuters" agentliyinin məlumatına istinadən xəbər verir ki, hadisə nəticəsində azı yeddi nəfər həlak olub, 23 nəfər isə itkin düşüb.
"Filojet" bu ərazi ilə Türkiyə arasında hər gün reyslər həyata keçirən bir neçə gəmidən biri idi. Yerli hakimiyyət orqanlarının məlumatına görə, bərə yerli vaxtla saat 12:30-da (Bakı vaxtı ilə 13:30) məşhur kurort şəhəri olan Girnəni tərk edərək Türkiyənin Taşucu limanına istiqamət alıbmış, lakin naməlum səbəbdən gəmi demək olar ki, dərhal burun hissəsindən su yığmağa başlayıb. ŞKTR rəsmilərinin bəyanatına görə, qəza sahildən 6-7 kilometr aralıda baş verib.
Faciəni şərh edən Şimali Kiprin baş naziri Tufan Ərhürman bildirib ki, itkin düşənlərin axtarışı üzrə xilasetmə əməliyyatı davam edir və mütəxəssislər "çox intensiv" işləyirlər. Ərhürman "CNN Türk" telekanalına verdiyi açıqlamada qeyd edib: "Əgər gəminin içərisində hələ də insanlar varsa, onlara çatmaq hazırda asan deyil. Müxtəlif texnologiyalardan istifadə etməklə səylər göstərilir".
Türkiyə Prezidenti Rəcəb Tayyib Ərdoğan da "Filojet"in qəzaya uğraması ilə bağlı münasibət bildirib. O, "X" sosial şəbəkəsindəki səhifəsində yazıb ki, Türkiyə Şimali Kipr hakimiyyəti ilə birlikdə qəzadan dərhal sonra xilasetmə əməliyyatına başlayıb. Ərdoğan həmçinin rəhbərlik etdiyi ölkənin xalqına və Kipr türk xalqına başsağlığı verib.
Almaz Həsənli
