“Alabuqa” dron zavodunda 12 minədək şimali koreyalı qul şəraitində işləyir
Tatarıstanda yerləşən “Alabuqa” xüsusi iqtisadi zonasında “Şahed” tipli hücum dronlarının yığıldığı zavodda insan alveri qurbanlarının əməyindən istifadə olunur. Oxuməni.az “The Insider” -ə istinadla xəbər verir ki, ABŞ-nin Strateji və Beynəlxalq Araşdırmalar Mərkəzinin (CSIS) və Corc Buş İnstitutunun hesabatının müəllifləri Viktor Ça və Cozef Kim bu qənaətə gəliblər. Onların məlumatına görə, dronları Rusiya yeniyetmələri, Qlobal Cənub ölkələrindən olan əcnəbilər və KXDR vətəndaşları yığırlar.
Ukrayna kəşfiyyatının qiymətləndirməsinə görə, “Alabuqa”ya 12 minədək şimali koreyalı göndərilib. Onlar saatda təxminən 2,5 dollar qazanırlar, Kim Çen In rejimi isə onların qazancının 70–90 faizini mənimsəyir.
Afrika, Latın Amerikası və Asiyadan olan 16–22 yaşlı qızlar ayda 500 dollardan başlayan maaşla xidmət sahəsində iş vədi ilə işə cəlb edilirlər. Lakin onlar zavoda çatdıqdan sonra pasportları əllərindən alınır, təxminən 90 faizi isə dronların yığılması işinə göndərilir.
“Alabuqa Politex” kollecinin tələbələri 15 yaşından etibarən “istehsalat təcrübəsi” adı altında işə cəlb olunurlar. Onların iş növbələri 12 saata qədər davam edir. Hesabat müəllifləri yazırlar:
“Şimali koreyalı işçilərin maaşları onları göndərən dövlət tərəfindən müsadirə olunur. Məcburi əməyin tərifi də məhz budur”.
Qeyd olunur ki, zavod ayda 5 500-dən çox dron istehsal etmək gücünə malikdir. Ukrayna kəşfiyyatının məlumatına görə, zavodun işçi heyətinin sayının təxminən 1 000 nəfərdən 40 min nəfərə çatdırılması planlaşdırılır.
Rusiya dronlarının kritik əhəmiyyətli elektron komponentlərinin təxminən 80 faizi Çin mənşəli detallardan ibarətdir. Hesabat müəllifləri ABŞ Maliyyə Nazirliyini işçilərin cəlb olunmasında iştirak edən şirkətlərə və təhsil müəssisələrinə qarşı sanksiyalar tətbiq etməyə, Vaşinqtonu isə araşdırma aparmaq üçün BMT vasitəsilə çoxtərəfli qrup yaratmağa çağırıblar.
Sentyabr ayında ABŞ və müttəfiqlərini birləşdirən Sanksiyaların Monitorinqi üzrə Çoxtərəfli Qrup (MSMT) Rusiya dron istehsalı müəssisələrində təxminən 25 min şimali koreyalının çalışdığını bildirib. Qrupun məlumatına görə, sanksiyalardan yayınmaq məqsədilə həmin şəxslər sənədlərdə tələbə kimi rəsmiləşdirilirlər.
Belə bir işçinin illik qazancı orta hesabla 7 500 dollar təşkil edir. Bu məbləğin böyük hissəsi Kim Çen In rejimi tərəfindən müsadirə olunur.
Almaz Həsənli
