Özbəkistan Rusiyada miqrantların hüquqlarının pozulması hallarının artması ilə bağlı Moskvaya etiraz edib
Özbəkistan Xarici İşlər Nazirliyi Rusiya səfiri ilə görüşdə Rusiya Federasiyasında əmək miqrantlarının hüquqlarının pozulması və onlara qarşı pis rəftar hallarının artması məsələsini qaldırıb. Daşkənd Rusiya tərəfini bu hallar barədə səlahiyyətli orqanlara məlumat verməyə çağırıb.
Özbəkistan XİN-in mətbuat xidməti xəbər verir ki, Özbəkistan Xarici İşlər Nazirliyi Rusiya hakimiyyətini əməkçi miqrantlara qarşı kobud rəftarla bağlı şikayətlərə diqqət yetirməyə çağırıb.
Mayın 2-də Özbəkistan xarici işlər nazirinin müavini Bobur Usmanov Rusiya səfiri Oleq Malqinov ilə görüş keçirib, görüşdə tərəflər konsulluq-hüquqi əməkdaşlıq və əmək miqrasiyası məsələlərini müzakirə ediblər.
Xarici İşlər Nazirliyinin məlumatına görə, tərəflər konsulluq məsələləri sahəsində əməkdaşlığın yüksək səviyyədə olduğunu vurğulayıblar: məsləhətləşmələr hər il keçirilir və əmək miqrasiyası üzrə işçi qrup özbəklərin Rusiyada mütəşəkkil işə cəlb edilməsi prosedurunu razılaşdırmaq üçün aylıq görüşlər keçirir.
Özbəkistan tərəfi Rusiyada əmək miqrantlarının hüquqlarının pozulması və onlara qarşı kobud rəftar hallarının artmasına diqqət çəkib.
“Belə hallar Rusiyada işləyən Özbəkistan vətəndaşlarının hüquq və azadlıqlarının pozulması kimi qiymətləndirilir və bu hüquq və azadlıqlar qəbul edən ölkənin qanunvericiliyinə uyğun olaraq təmin edilməlidir”, - deyə məlumatda bildirilir. Hansı insidentlərin müzakirə olunduğu açıqlanmır.
Bununla əlaqədar Xarici İşlər Nazirliyi Rusiya hakimiyyətini qaldırılan məsələləri diqqətlə öyrənməyə və Özbəkistanın narahatlığını Rusiya Federasiyasının müvafiq səlahiyyətli orqanlarına çatdırmağa çağırıb.
Görüşün yekununda tərəflər hər iki ölkənin ərazilərində Özbəkistan və Rusiya vətəndaşlarının hüquq və azadlıqlarının təmin edilməsi üçün sıx əməkdaşlığı davam etdirmək barədə razılığa gəliblər.
Əziz Mustafa, Oxuməni.az
