Tramp ABŞ-ı YUNESKO-dan çıxarmaq qərarına gəlib

ABŞ prezidenti Donald Tramp təşkilatın “anti-Amerika və anti-İsrail əhval-ruhiyyəsi” səbəbindən ölkəni YUNESKO-dan çıxarmaq qərarına gəlib. Qərar Birləşmiş Ştatların BMT qurumunda davamlı iştirakının məqsədəuyğunluğunun nəzərdən keçirilməsindən sonra qəbul edilib.
Ağ Evin mətbuat katibinin müavini Anna Kelli “New York Post” qəzetinə deyib: “Prezident Tramp ABŞ-ı YUNESKO-dan çıxarmaq qərarına gəlib: bölücü, mübahisəli mədəni və sosial məsələləri təbliğ edən və amerikalıların noyabrda səs verdiyi sağlam düşüncə və siyasətlə tamamilə zidd olan təşkilat”.
Fevralın 4-də Donald Tramp ABŞ-ın YUNESKO-ya üzvlüyünü nəzərdən keçirən sərəncam imzalayıb. Sənəddə iddia edilib ki, BMT-nin bəzi qurumları və təşkilatları beynəlxalq sülhü təşviq etmək kimi qlobal məqsəddən kənara çıxıb və antisemitizmi təbliğ etməklə ABŞ-ın maraqlarına zidd hərəkət ediblər. YUNESKO, ABŞ prezidentinin sözlərinə görə, son on il ərzində İsrail əleyhinə əhval-ruhiyyə nümayiş etdirib və onun artan borcları ilə bağlı problemləri həll edə bilməyib.
ABŞ artıq iki dəfə YUNESKO-dan çıxıb: 1984-cü ildə 40-cı prezident Ronald Reyqanın qərarı ilə, daha sonra isə 2017-ci ildə Donald Trampın təşəbbüsü ilə. 2023-cü ildə Amerikanın 46-cı prezidenti Co Bayden ABŞ-ın YUNESKO-ya üzvlüyünü bərpa etmək, o cümlədən Çinin təsirinin artmasının qarşısını almaq qərarına gəlib.
Almaz Həsənli