Kimya üzrə Nobel mükafatı laureatlarının adları açıqlanıb

Kimya üzrə Nobel Mükafatı alimlər Susumu Kitagava (Kyoto Universiteti,Yaponiya), Riçard Robson (Melburn Universiteti,Avstraliya) və İordaniya əsilli amerikalı kimyaçı, Berklidəki Kaliforniya Universitetinin kimya professoru Ömər M. Yaqiyə (Berkli Universiteti, ABŞ) “metal-üzvi strukturların inkişafına görə” verilib. Bu barədə mükafatın sosial media hesablarında məlumat verilib.

Kimya üzrə Nobel Komitəsinin sədri qeyd edib ki, “Metal-üzvi strukturlar nəhəng potensial təklif edir, xüsusi hazırlanmış xassələrə malik materialların yaradılması üçün əvvəllər ağlasığmaz imkanlar açır”.

"2025-ci il Kimya üzrə Nobel mükafatı laureatları, qazların və digər kimyəvi maddələrin keçə biləcəyi böyük boşluqlara malik molekulyar konstruksiyalar yaradıblar. Bu konstruksiyalar, metal-üzvi çərçivələr, səhrada havadan su toplamaq, karbon qazını udmaq, zəhərli qazları saxlamaq və ya kimyəvi reaksiyaları kataliz etmək üçün istifadə oluna bilər", - deyə mükafatın saytındakı press-relizdə bildirilir.

2024-cü ildə Kimya üzrə Nobel Mükafatı zülal quruluşu ilə bağlı araşdırmalarına görə amerikalı Devid Beyker və britaniyalı alimlər Demis Hassabis və Con Camperə verilib.

Almaz Həsənli