Suriyada amerikalı hərbçilər həlak olub

Suriyanın Palmira şəhərində İŞİD terror qruplaşmasının hücumu nəticəsində üç amerikalı əsgər- iki hərbçi və bir mülki tərcüməçi həlak olub.
Oxuməni.az-ın BBC Rus Xidmətinə istinadən verdiyi məlumata görə, Pentaqonun sözçüsü Şon Parnell bildirib ki, daha üç nəfər yaralanıb.
O, hücumun bölgədə İŞİD-ə qarşı mübarizə və terrorizmə qarşı əməliyyatların bir hissəsi olaraq başladılan missiya zamanı baş verdiyini aydınlaşdırıb. Hazırda araşdırma aparılır.
ABŞ Mərkəzi Komandanlığının (CENTCOM) əlavə etdiyinə görə, amerikalılar 13 dekabrda tək bir İŞİD yaraqlısı tərəfindən pusquda öldürülüb. Pentaqon katibi Pit Heqset bildirib ki, hücumçu müttəfiq qüvvələri tərəfindən atışma zamanı öldürülüb.
"Diqqətli olun, dünyanın istənilən yerində amerikalılara hücum etsəniz, qısa və problemli həyatınızın qalan hissəsini ABŞ-ın sizi ovlayacağını, tapacağını və amansızcasına öldürəcəyini bilərək keçirəcəksiniz", - deyə o vurğulayıb.
ABŞ Prezidenti Donald Tramp hərbçilərin ölümünə münasibət bildirərək "sərt qisas" vəd edib. O, sosial media platforması Truth Social-da yazıb: "Suriyada üç böyük Amerika vətənpərvərinin, iki əsgərin və bir mülki tərcüməçinin itkisinə görə kədərlənirik. Həmçinin, sağ-salamat olduqları təsdiqlənmiş üç yaralı əsgər üçün də dua edirik".
O, əlavə edib ki, hücum yeni hakimiyyətin tam nəzarəti altında olmayan "çox təhlükəli bir ərazidə" baş verib və "Suriya prezidenti Əhməd əl-Şara bu hücumdan son dərəcə qəzəblənib və narahatdır".
Suriya xarici işlər naziri Əsəd əl-Şeybani ölkəsinin "Palmira yaxınlığında birgə Suriya-Amerika antiterror patruluna qarşı törədilən terror hücumunu qətiyyətlə pislədiyini" bildirib. O, həmçinin qurbanların ailələrinə, hökumətə və ABŞ xalqına başsağlığı verib.
Almaz Həsənli