Tramp Venesuelaya dəniz blokadası elan etdi

ABŞ Prezidenti Donald Tramp hazırkı Venesuela hökumətini xarici terror təşkilatı elan etdi. O, həmçinin ölkə ilə əlaqəli bütün sanksiyalı neft tankerlərinə qarşı tam və son dəniz blokadası əmri verdi. O, bunu sosial media platforması Truth Social-da elan etdi.
Tramp bildirib ki, Venesuela Cənubi Amerika tarixinin ən böyük hərbi armadası ilə əhatə olunub və bu, yalnız artacaq. O bildirib ki, bu təzyiq ölkə hökuməti ABŞ-a "oğurlanmış" bütün neft, torpaq və digər aktivləri qaytarana qədər davam edəcək.
ABŞ Prezidenti Nikolas Maduronun "qanunsuz rejimini" neft gəlirlərindən narkoterrorizm, insan alveri və qətlləri maliyyələşdirmək üçün istifadə etməkdə günahlandırdı. Eyni zamanda, Tramp bildirib ki, keçmiş prezident Co Baydenin "zəif və səriştəsiz" administrasiyası tərəfindən ABŞ-a buraxıldığı iddia edilən qanunsuz miqrantların Venesuelaya qayıtması sürətləndirilir.
Tramp yekun olaraq bildirib ki, "Amerika cinayətkarların, terrorçuların və ya digər ölkələrin millətimizi soymasına, təhdid etməsinə və ya zərər verməsinə icazə verməyəcək, eləcə də düşmən rejimin neftimizi, torpağımızı və ya digər aktivlərimizi ələ keçirməsinə icazə verməyəcəyik - bunların hamısı dərhal ABŞ-a qaytarılmalıdır".
Noyabrın 30-da Tramp Venesuela prezidenti Nikolas Maduroya vəzifəsindən getməkdən imtina edəcəyi təqdirdə mümkün güc tətbiq etməklə hədələyib. Bundan əvvəl ABŞ lideri Venesuela və ətraf ərazilər üzərindəki hava məkanının bağlanacağını elan etmişdi. Bu açıqlama ABŞ-ın Karib dənizində hərbi mövcudluğunun güclənməsi fonunda verilib.
Almaz Həsənli