Türkiyə kəşfiyyat, zərbələr və hava hücumundan müdafiə aldatma məqsədli dronları təqdim edib

Türkiyə kəşfiyyat, zərbə və hava hücumundan müdafiə missiyaları üçün hazırlanmış Çepni ailəsinin taktiki sabit qanadlı pilotsuz uçuş aparatlarını (PUA) təqdim etdi. Oxuməni.az xəbər verir ki, bu barədə CNN Türk-ün məlumatında deyilir.

Qeyd olunur ki, Çepni müxtəlif missiyaları əlaqələndirilmiş şəkildə yerinə yetirməyə imkan verən ortaq bir gövdə dizaynına malikdir. Tək bir operator sistemi konteyner saxlama yerindən 30 dəqiqədən az müddətdə yerləşdirə bilər.

Yeni dron ailəsi üç versiyada mövcuddur:

Çepni Midrange dronu yüzlərlə kilometr məsafə qət edə bilir və 15 kq-a qədər faydalı yük daşıyır. Missiyadan asılı olaraq, o, müxtəlif avadanlıqlar və ya zərbə silahları ilə təchiz edilə bilər. Bu dronların uçuşu üçün uçuş-enmə zolağı tələb olunmur, çünki onlar nəqliyyat vasitəsinin arxasındakı rampadan buraxıla və ya sıxılmış hava və ya qazla hərəkətə gətirilə bilər.

Çepni Target dronu radar, raket və artilleriya hava hücumundan müdafiə sistemlərinin iştirak etdiyi təlimlər zamanı hava hədəfi kimi istifadə üçün nəzərdə tutulub. O, 5 kq yük daşıyır və 100 km-dən çox məsafədə tapşırıqlar yerinə yetirə bilir. Eniş şassisi olmadan, alt gövdəsinə enə bilir və bundan sonra növbəti tapşırıq üçün tez bir zamanda hazırlana bilir.

Çepni Aldatıcı dronu düşmən hava hücumundan müdafiə sistemlərini aldatmaq və onların radarlarını yayındırmaq üçün nəzərdə tutulub. Cihazın kiçik effektiv səpələnmə sahəsi var və saatda 185 km-ə qədər sürətlə uçur.

Əziz MUSTAFA