Seyidovun Türkiyədə həbsinin bəzi təfərrüatları

Türkiyədə Sədərək Keçid-Gömrük Məntəqəsinin rəisi Mirməhəmməd Seyidovun saxlanması ilə bağlı bəzi təfərrüatlar açıqlanıb.

Türkiyə mətbuatının verdiyi məlumata görə, gömrük rəisi Mirməhəmməd Seyidovun saxlanıldığı əməliyyatda 280 polis iştirak edib. Əməliyyat zamanı saxlanılanlar arasında biri qadın olmaqla, Naxçıvan Sədərək Keçid Gömrük Məntəqəsinin 7 işçisi və 10 transfer firma sahibi də olub. Ədliyyəyə göndərilən şübhəlilərdən ilk gün bir neçə nəfər həbs edilərək cəzaçəkmə müəssisəsinə göndərilib.
Qars aeroportunda tutulandan sonra İqdır polis idarəsində saxlanılan M.Seyidov dekabrın 18-də gecəyarısına qədər dindirilib. Dindirmədən sonra M.Seyidov və onunla eyni vaxtda həbs edilən türkiyəli gömrük məmurları barələrində həbs qəti-imkan tədbirinin seçilməsi üçün növbətçi məhkəməyə çıxarılıblar.
Məhkəmə Sədərək gömrüyünün rəisinin və daha bir neçə şəxsin barəsində istintaq müddəti üçün 3 aylıq həbs-qətimkan qərarı çıxarıb və şübhəlilər həbsxanaya göndərilib. Ümumilikdə, Naxçıvanla Türkiyə arasındakı Dilucu Sərhəd qapısında aparılan rüşvət və qaçaqmalçılıq əməliyyatı çərçivəsində 18 şübhəli şəxs saxlanılıb, onlardan 9-nun həbs olunduğu bildirilir.