Bu dəfə redaktor “AccessBank”ı məhkəməyə verdi

Bu gün Yasamal Rayon Məhkəməsində hakim Elşad Şamayevin sədrliyi ilə məhkəmə iclası keçirilib. İclasda "Mediainfo" xəbər portalının baş redaktoru Natiq Qocayevin "AccessBank QSC"-nə qarşı iddia ərizəsinə baxılıb. İddiaçı Natiq Qocayev mövcud iddia ərizəsi ilə bağlı məhkəmə heyətinə ətraflı məlumat verib. O, uzun illərdir "AccessBank QSC"-nin müştərisi olduğunu, təxminən 8 dəfə adıçəkilən bankdan kredit götürdüyünü və bütün kredit müqavilələri üzrə öhdəliklərini vaxtında yerinə yetirdiyini, lakin 2016-cı ildə bank tərəfindən indiyədək ardıcıl olaraq aldadıldığını müəyyən etdiyini məhkəmə heyətinə bildirib. Hakim Elşad Şamayev "AccessBank QSC"-yə Natiq Qocayevlə bağlı bütün kredit müqavilələrini məhkəməyə təqdim etmək barədə 01 iyun 2016-cı il tarixində sorğu göndərdiyini bankın nümayəndəsi Şahin Sadıqova xatırladıb. "AccessBank QSC"-nin nümayəndəsi Şahin Sadıqov cəmi bir kredit üzrə 2015-ci ilə aid müqaviləni məhkəməyə təqdim edib. Daha sonra "AccessBank QSC"-nin nümayəndəsi Şahin Sadıqov məhkəmə iddiasının təmin olunmaması üçün hakimə və qarşı tərəfə yazılı etiraz məktubu təqdim edib. Hakim Elşad Şamayev tərəflərin şifahi razılığı ilə işin araşdırılması üçün ekspertiza təyin edib.

Hadisə ilə bağlı Mediainfo.az-a açıqlama verən Natiq Qocayev "AccessBank QSC"-nin nümayəndəsinin məhkəməyə hörmətsiz yanaşdığını bildirərək bunları deyib: "Bugünkü iclas saat 11:30-a təyin olunsa da, qarşı tərəfin nümayəndəsi nədənsə məhkəməyə gəlməmişdi. Təxminən 1 saat gözlədikdən sonra katib bankın nümayəndəsinə zəng vuraraq onu məhkəməyə çağırdı. "AccessBank QSC"-nin nümayəndəsi Şahin Sadıqov gec də olsa, iclasa gəldi. Sonradan mənə aydın oldu ki, o, başqa bir məhkəmə üçün, "AccessBank QSC"-nin iddiaçı olduğu məhkəmə üçün Yasamal Rayon Məhkəməsinə gəlib".

Natiq Qocayev "AccessBank QSC"-nin bilərəkdən bəzi məsələlərdə manipulyasiya etdiyini də dilə gətirib: ""Banklar Haqqında Qanuna" və "Mülki Məcəllənin" müvafiq bəndinə əsasən banklar müştərilərlə bağladığı müqavilənin sürətini ən azı 5 il müddətində saxlamalıdır. Buna baxmayaraq, məhkəmənin mənimlə bağlı "AccessBank QSC"-nə göndərdiyi sorğu düzgün cavablandırılmadı. Bank mənimlə bağladığı bütün kredit müqavilələrinin surətini bugünkü məhkəməyə təqdim etməli idi. Ancaq bankın nümayəndəsi təxminən 8 müqavilənin ancaq sonuncusunu məhkəməyə təqdim etdi. Bu isə onu deməyə əsas verir ki, bank öz qeyri-qanuni əməllərini ört-basdır etmək üçün müqavilələrin üzə çıxarılmasında maraqlı deyil. Onların iddia ərizəsini rədd etmək barədə etiraz məktubu da əsassızdır. Çünki mən bankı qanunsuz yollarla vətəndaşlardan, o cümlədən məndən külli miqdarda pul mənimsədiyi üçün məhkəməyə vermişəm. Ümumiyyətlə "AccessBank QSC"-nin nümayəndəsi məhkəmədə özünü elə aparırdı ki, elə bil iddiaçı tərəf odur. Mən dəfələrlə ona bu barədə iradımı bildirdim."

Haqlı olduğuna əminliyini vurğulayan Natiq Qocayev "AccessBank QSC" ilə mübarizəsini indən belə də davam etdirəcəklərini, yeni müstəvilərə daşıyacaqlarını, ictimailəşdirəcəklərini və günahkarlar cəzasını alanədək mübarizə aparacaqlarını bildirib: "Biz dərin jurnalist araşdırması aparmışıq. Hətta bankın rəsmi saytındakı məlumatları da araşdırmışıq. Əlimizdə müxtəlif vətəndaşlarla "AccessBank QSC" arasında bağlanmış müqavilələr, Ödəniş Planları da var. Hər bir halda bankın vətəndaşları aldatdığı, onların maliyyə vəsaitlərini qeyri-qanuni yollarla mənimsədiyi sübuta yetirilir. Eybi yox, qoy onlar mənim sənədlərimi gizlətsinlər. Biz jurnalist təşkilatı olaraq, "AccessBank QSC"-nin digər müştərilərinin sənədlərini toplamağa başlayacağıq. Aidiyyatı üzrə bütün instansiyalara göndərəcəyik. Hətta prokurorluğa və prezidentə də müraciət ünvanlayacağıq. Məsələni ictimai müzakirəyə çıxaracağıq. Qoy "AccessBank QSC"-nin fəaliyyəti dərindən araşdırılsın, fəaliyyətlərində cinayət tərkibi varsa, müəyyən edilsin. İlk növbədə vətəndaşlara dəyən ziyan ödənilsin. Haqq-ədalət yerini tapana, günahkarlar cəzasını alana qədər mübarizə aparacağıq."

Mövzu ilə bağlı silsilə məqalələri yaxın günlərdə Sizlərə təqdim edəcəyik.

Mediainfo.az