BMT ABŞ-ın Rusiya və Ukrayna ilə razılaşmasını alqışlayır

BMT baş katibinin nümayəndəsi Stefan Düjarrik Səudiyyə Ərəbistanında keçirilən görüşlərdən sonra Vaşinqtonun Rusiya və Ukrayna tərəfləri ilə razılaşmalarını müsbət qiymətləndirib.

"Biz açıq şəkildə alqışladığımız iki bəyanat gördük. Bu məsələlər, xüsusən də Qara dənizdə naviqasiya azadlığı, BMT-nin baş katibi və onun komandası praktiki olaraq münaqişənin əvvəlindən onlar haqqında danışır", - Düjarrik brifinqdə deyib.

O qeyd edib ki, Ər-Riyadda keçirilən danışıqlarda BMT təmsil olunmayıb. Bir jurnalistin təşkilatın Ukrayna münaqişəsinin nizamlanmasına dair razılaşmada hər hansı rol oynayıb-oynamayacağı ilə bağlı sualına Düjarrik deyib ki, bu barədə danışmaq hələ tezdir.

Bu həftə Ər-Riyadda Rusiya-Amerika ekspert məsləhətləşmələri baş tutub. Moskvanı Federasiya Şurasının Beynəlxalq Əlaqələr Komitəsinin rəhbəri Qriqori Karasin və FSB direktorunun müşaviri Sergey Beseda təmsil edib. Bundan əvvəl Səudiyyə Ərəbistanının paytaxtında amerikalılarla Ukrayna nümayəndələri arasında danışıqlar aparılıb.

Danışıqlardan sonra Ağ Ev bildirib ki, Vaşinqton və Kiyev digər məsələlərlə yanaşı, Qara dənizdə təhlükəsiz gəmiçilik üzərində işləmək barədə razılığa gəliblər. Oxşar müddəa Rusiya ilə danışıqlardan sonra Ağ Evin bəyanatında da yer alıb.

“ABŞ və Rusiya Qara dənizdə təhlükəsiz naviqasiyanı təmin etmək, güc tətbiqinə yol verməmək və kommersiya gəmilərindən hərbi məqsədlər üçün istifadənin qarşısını almaq barədə razılığa gəliblər”, - deyə məlumatda bildirilir.

“Rusiya və ABŞ prezidentləri arasında əldə olunan razılaşmaya əsasən, Rusiya və Amerika tərəfləri Qara dənizdə naviqasiya təhlükəsizliyinin təmin edilməsi, güc tətbiq edilməməsi və kommersiya gəmilərinin hərbi məqsədlər üçün istifadəsinin qarşısının alınmasını əhatə edən “Qara dəniz təşəbbüsü”nün həyata keçirilməsini təmin etmək barədə razılığa gəliblər.

Əziz Mustafa, Oxuməni.az