İsrail Müdafiə Nazirliyi ordusuna ilk lazerli hava hücumundan müdafiə sistemini təhvil verib

İsrail dövlətinin Müdafiə Nazirliyi, lazer texnologiyasına əsaslanan qabaqcıl "Iron Beam" (Dəmir şüa) hava hücumundan müdafiə sisteminin ilk qurğusunu İsrail Müdafiə Qüvvələrinə (İDF, SAXAL) təhvil verib.
Oxuməni.az-ın TASS-a istinadən verdiyi məlumata görə, bu barədə qurumun mətbuat xidməti məlumat yayıb.
"İsrail Müdafiə Nazirliyi İDF-yə ilk yüksək güclü lazer döyüş qurğusu olan " Iron Beam"ı təhvil verib. Geniş sınaq silsiləsi zamanı müxtəlif təhdidlərə qarşı effektivliyini sübut etmiş, bu zaman raketləri, minaatan mərmilərini və pilotsuz uçuş aparatlarını uğurla neytrallaşdırmış sistem, İsrail Hərbi Hava Qüvvələrinə inteqrasiya olunacaq və "Dəmir günbəz", "Davudun layığı" və "Xets" ("Ox") sistemlərinə əlavə olaraq İsrailin çoxsəviyyəli hava hücumundan müdafiə sisteminə daxil ediləcək", - deyə bəyanatda bildirilir. Qurum qeyd edib ki, " Iron Beam " "qlobal texnoloji və mühəndislik nailiyyətini" təmsil edir və "unikal elektro-optik tuşlama sistemi ilə güclü lazer şüası mənbəyi"dir ki, bu da "əhəmiyyətli məsafədə geniş spektrli hədəfləri maksimal dəqiqliklə və üstün effektivliklə, olduqca aşağı xərclərlə neytrallaşdırmağa" imkan verir.
İsrail Müdafiə Nazirliyinin Baş direktoru Amir Baram qeyd edib ki, "İsrail Hərbi Hava Qüvvələrinə ilk " Iron Beam " sisteminin təhvil verilməsi, eləcə də çoxsaylı əlavə qurğuların istehsalda olması ilkin mərhələnin başa çatmasını və inkişafdan kütləvi istehsal mərhələsinə keçidi bildirir". "Bu, texnoloji inqilabın yalnız başlanğıcıdır və istehsalı davam etdirərək biz (İsrail – red.) yerüstü və hava tətbiqi üçün növbəti nəsil hava hücumundan müdafiə sistemlərinin inkişafını irəli aparırıq", - deyə o əlavə edib. Baramın fikirləri İsrail Müdafiə Nazirliyinin mətbuat xidməti tərəfindən yayılıb.
"Dəmir şüa" sistemi ilkin olaraq lazer şüası vasitəsilə ultra-qısa mənzilli raketləri, eləcə də minaatan və artilleriya mərmilərini neytrallaşdırmaq üçün nəzərdə tutulub. İsrailin raketdən müdafiə sisteminin modernləşdirilməsi planları ilk dəfə 2022-ci ildə ölkənin o vaxtkı Baş naziri Naftali Bennett tərəfindən səsləndirilib. O zaman o, çox sayda raket-neytrallaşdırıcıları əvəz edə biləcək və ənənəvi hava hücumundan müdafiə sistemlərinə daha ucuz alternativ olacaq müdafiə "lazer divarı" yaratmağı təklif etmişdi.
Almaz Həsənli