Husilər İsraili Somalilenddəki hədəflərini vurmaqla hədələyib

Yəmənli "Ənsarullah" (husilər) qruplaşmasının lideri bazar günü xəbərdarlıq edib ki, Somalilenddə hər hansı İsrail mövcudluğu onların qüvvələri üçün hərbi hədəf sayılacaq. Bu barədə Oxuməni.az TRT-nin rus xidmətinə istinadən xəbər verir.
Yazılı bəyanatında Əbdül-Məlik əl-Husi İsrailin Somalilendı Somalidən ayrı bir dövlət kimi tanımasını "düşmənçilik aktı" adlandırıb və əlavə edib ki, bu, təkcə Somaliyə deyil, həm də qonşu Afrika ölkələrinə, Yəmənə və Qırmızı dənizə çıxışı olan bütün dövlətlərə qarşı yönəlib.
Əl-Husi vurğulayıb ki, İsrailin tanınmasının heç bir hüquqi və ya siyasi qüvvəsi yoxdur, həmçinin Somali xalqına husilərin "sarsılmaz" dəstəyini təmin edib. "Qardaşlarımız, Somali xalqının yanında olmaq üçün əlimizdən gələn bütün tədbirləri görəcəyik. Bu, Somalilenddə hər hansı İsrail mövcudluğunu silahlı qüvvələrimiz üçün hərbi hədəf kimi nəzərdən keçirməyi əhatə edir. Bu, Somaliyə və Yəmənə hücumdur və regional təhlükəsizliyə açıq təhdiddir, buna qəti şəkildə müqavimət göstərilməlidir", - deyə Yəmənli siyasətçi bildirib.
Husilərin lideri qeyd edib ki, İsrail Somalilendi Somaliyə, digər Afrika ölkələrinə, Yəmənə və ərəb dünyasına qarşı düşmənçilik fəaliyyəti üçün baza kimi istifadə etməyə çalışır və bunun Qırmızı dəniz və Ədən körfəzinin təhlükəsizliyi üçün təhdid yaratdığını xəbərdar edib.
Əl-Husi vurğulayıb ki, onlar Somalinin heç bir hissəsinin Şərqi Afrika ölkəsinin təhlükəsizliyi, müstəqilliyi və suverenliyi hesabına İsrail üçün bir dayaq nöqtəsinə çevrilməsinə imkan verməyəcəklər.
Almaz Həsənli