Apple 2026-cı ildə iPhone 18-in buraxılışından imtina etdi

Apple iPhone 18-in təqdimatını iki hissəyə ayıraraq, on ildən artıq müddətdə ilk dəfə ənənəvi iPhone buraxılış cədvəlini dəyişməyi planlaşdırır: 2026-cı ilin payızı və 2027-ci ilin yazı.
“MacRumors” nəşrinin məlumatına görə, bu il bazarda yalnız yeni nəsil üç model təqdim olunacaq: iPhone 18 Pro, iPhone 18 Pro Max, həmçinin uzun müddətdir gözlənilən "qatlanan" iPhone Fold. Pro modelləri dizaynda əhəmiyyətli dəyişikliklər almayacaq, buna görə də əlavə təkmilləşdirmə vaxtı tələb olunmur.
Əsas iPhone 18-in isə iPhone Air 2 və daha sərfəli iPhone 18e ilə birlikdə 2027-ci ilin yazına təxirə salınacağı gözlənilir. Bu qərar həm əsas iPhone 17-nin böyük uğuru, həm də istehlakçıları çox sayda yeni modellə yükləmək istəməməklə bağlıdır.
Hazırda iPhone-ların mövcud xətti 5 cihazdan ibarətdir, gələn il isə vəziyyət daha da kəskinləşəcək, çünki bizi tarixdə ilk qatlana bilən iPhone gözləyir. Modellərin çeşidi daha da genişlənəcək və alıcıların bu müxtəliflik arasında çaşqınlıq yaşamaması üçün şirkət buraxılışları ayırmaq istəyir.
Daha əvvəl bazarda belə şayiələr yayılmışdı ki, 2026-cı ildən etibarən əsas iPhone-lar "pro" modellərindən altı ay gec buraxılacaq. Beləliklə, adi iPhone 17 klassik 12 ay əvəzinə 18 ay aktual olacaq.
Apple, iPhone X səviyyəsində smartfonların böyük yenidən dizaynına yaxınlaşır – son sızmalara görə, iPhone 18, ekran altı Face ID texnologiyasına sahib ilk iPhone ola bilər.

Almaz Həsənli