Yəmən Hadramautdakı strateji obyektlərə tam nəzarəti elan edib

Hökumətin Vətən Qalxanı qüvvələri ölkənin şərqindəki Hadramaut Vadisində təhlükəsizlik əməliyyatını başa çatdıraraq əsas hərbi bazaları və mülki obyektləri nəzarətə götürüb. Bu barədə Hadramaut əyalətinin qubernatoru Salem Əl-Xanbaşi bildirib.

Yəmən xəbər agentliyi SABA qubernatordan sitat gətirir: "Əl-Vadi və Əs-Səxrah bölgələrində hərbi düşərgələrin təhlükəsizliyini təmin etmək üçün əməliyyat tam uğurla başa çatıb". Əl-Xanbaşi hökumət qüvvələrinin bütün əsas mövqelərə yerləşdirilməsini başa çatdırdığını və "Seiyun Beynəlxalq Hava Limanını, eləcə də hökumət obyektlərini və vacib infrastrukturu tam şəkildə təmin etdiyini" təsdiqləyib.

Səudiyyə Ərəbistanının "Əl-Ərəbiyyə" televiziya kanalının məlumatına görə, "Vətən Qalxanı" bölmələri Seyyun şəhərindəki Respublika Sarayına və Hadramaut əyalətinin şimal hissəsini əhatə edən Birinci Hərbi Bölgənin qərargahına nəzarəti ələ keçirib. Qubernator həmçinin bildirib ki, hakimiyyət orqanları Səudiyyə Ərəbistanının rəhbərlik etdiyi koalisiyadan Əl-Qubar düşərgəsindəki Cənubi Keçid Şurası (STC) separatçılarının Əl-Mukalla liman şəhərinə doğru irəliləməyə cəhd göstərmələri halında onları aradan qaldırmağı xahiş edib. Əl-Xanbaşi həmçinin STC qüvvələrinin Hadramaut və Əl-Mahradan Şəbva əyalətinə geri çəkilməsi üçün dəhlizin açıldığını elan edib.

Yəməndə vəziyyət Birləşmiş Ərəb Əmirliklərinin dəstəklədiyi STC separatçıları 2025-ci ilin dekabr ayının əvvəlində Yəmənin şərqindəki Hadramaut və Mahra əyalətləri üzərində nəzarəti ələ keçirdikdən sonra gərginləşib. STC sədri Aydarus əl-Zubeydi növbəti mərhələnin respublikanın cənubunda gələcək dövlətin institutlarının yaradılmasını əhatə edəcəyini bildirib. Ötən il dekabrın 27-də Yəmənin Prezident İdarəetmə Şurasının rəhbəri Rəşad Məhəmməd əl-Alimi Səudiyyə Ərəbistanının rəhbərlik etdiyi koalisiyadan hərbi yardım istəyib. Daha sonra o, BƏƏ ilə birgə müdafiə müqaviləsini ləğv edən və Əmirlik qüvvələrinin 24 saat ərzində respublikadan çıxarılmasını tələb edən bir fərman imzaladı. Səudiyyə Ərəbistanı Xarici İşlər Nazirliyi də öz növbəsində BƏƏ-ni şərqi Yəməndəki üsyanı dəstəkləməkdə günahlandırdı və bunu milli təhlükəsizliyinə təhdid adlandırdı. Dekabrın 30-da BƏƏ Müdafiə Nazirliyi ölkədə antiterror missiyaları həyata keçirən məhdud kontingentinin sayının azaldıldığını və qoşunların 2 yanvarda çıxarılmasının başa çatdığını elan etdi.

Əziz Mustafa