Mette Frederiksen Aİ ölkələrini Qrenlandiya məsələsində birləşməyə çağırıb

Danimarka Baş naziri Mette Frederiksen, bölünmənin Rusiyanın əlinə keçəcəyi və xarici təhdidlərə qarşı cavabını çətinləşdirəcəyi barədə xəbərdarlıq edərək, Avropa Birliyini birliyi qorumağa çağırdı. Bu barədə Oxumeni.az DR nəşrinə istinadən məlumat yayıb.

Mette Frederiksen, Qrenlandiya məsələsi ilə bağlı ABŞ ilə münasibətlərdə bəzi gərginlikləri qeyd edərək, Aİ üzv dövlətləri arasında birliyin hər hansı bir xarici iqtisadi və ya siyasi çağırışa koordinasiyalı cavab üçün vacib olduğunu vurğuladı.

"Əgər ciddi şəkildə parçalanmağa başlasaq, şərqdə Avropanı birbaşa təhdid edən Rusiyanın bizə zərər verməsi çox asan olacaq", - deyə Frederiksen bildirib və Aİ ölkələrinin vahid cavabının yeganə irəliləyiş yolu olduğunu vurğulayıb.

O, ehtimal ki, ABŞ-ın Qrenlandiyaya qarşı təhdidlərinə necə cavab vermək barədə Aİ daxilindəki fikir ayrılıqlarına istinad edib. Qeyd etmək lazımdır ki, 22 yanvar cümə axşamı günü Baş nazir Brüsseldə keçiriləcək təcili Aİ sammitində iştirak edəcək və orada ABŞ-ın tarif artımı və Aİ hərəkətlərinin mümkün koordinasiyası müzakirə olunacaq. Frederiksen Aİ üzv dövlətləri arasında yekdilliyin olmayacağına inanır.

"İnanmıram ki, bütün Aİ ölkələri eyni şeyi deyəcək. Avropaya açıq şəkildə qarşı çıxanlar var", - deyə o vurğulayıb.

Eyni zamanda, Baş nazir Avropanın mümkün iqtisadi zərbələrə hazırlaşmasının vacibliyini bildirib.

"Əsas məsələ 1 fevralda ticarət müharibəsi başlayarsa, hazır olmaqdır. Amma ABŞ bunu başladarsa, Avropa cavab verməlidir", - Frederiksen deyib.

O, əlavə edib ki, münaqişənin həm Avropa, həm də Amerika iqtisadiyyatına mənfi təsir göstərəcəyi üçün ondan qaçmağa ümid edir.

Əziz MUSTAFA