Alimlər müəyyən ediblər ki, kofe sirroz və qaraciyər xərçəngi riskini azalda bilər

Sedars-Sinay Tibb Mərkəzinin alimləri müəyyən ediblər ki, müntəzəm kofe qəbulu qaraciyər sirrozu, qaraciyər xərçəngi və bu orqanın xəstəliklərinin ağırlaşmalarından ölüm riskinin aşağı olması ilə əlaqəlidir. Oxuməni.az xəbər verir ki, tədqiqatın nəticələri "Clinical Gastroenterology and Hepatology (CGH)" jurnalında dərc olunub.

Tədqiqat, müşahidələrə başlandığı zaman sirroz və ya qaraciyər xərçəngi olmayan 354 957 Böyük Britaniya Biobank iştirakçısını əhatə edib. Alimlər onların sağlamlıq vəziyyətini orta hesabla 13 il ərzində izləyiblər.

Təhlil göstərib ki, gündə beş və ya daha çox fincan kofe içən insanlarda sirroz inkişaf riski 32% daha aşağı, qaraciyər xərçəngi riski 47% daha aşağı, qaraciyər xəstəliklərindən ölüm ehtimalı isə kofe içməyənlərlə müqayisədə 42% daha aşağı olub.

Eyni zamanda, müsbət təsir gündə bir-iki fincan kofe qəbulu zamanı artıq müşahidə olunub, ən qabarıq isə üç-dörd fincan diapazonunda olub. Lakin müəlliflər vurğulayırlar ki, nəticələr gündə beş fincandan çox kofe içmək tövsiyəsi kimi qəbul edilməməlidir.

Bu əlaqənin mümkün mexanizmlərini aydınlaşdırmaq üçün tədqiqatçılar həmçinin qaraciyərin maqnit-rezonans tomoqrafiyası məlumatlarını və qan analizlərinin nəticələrini təhlil ediblər. Kofe həvəskarlarında qaraciyərdə daha az yağ, dəmir, fibroz və iltihab əlamətləri aşkar edilib. Bundan əlavə, bu qrupda orqanın sağlam funksiyası ilə əlaqəli zülalların səviyyəsi daha yüksək, iltihab və toxuma çapıqları ilə əlaqəli zülalların konsentrasiyası isə daha aşağı olub.

Oxşar nəticələr həm adi, həm də kofeinsiz kofe həvəskarlarında müşahidə olunub. Bu, qoruyucu təsirin yalnız kofeinlə deyil, həm də içkidə olan digər bioloji aktiv maddələrlə əlaqəli olduğunu göstərir.

Müəlliflər qeyd edirlər ki, tədqiqat müşahidə xarakterli olub və kofenin qaraciyər xəstəliklərinin qarşısını aldığını sübut etmir. Onların sözlərinə görə, əsas profilaktik tədbirlər hələ də sağlam çəkini qorumaq, spirtli içki qəbulunu məhdudlaşdırmaq, müntəzəm fiziki fəaliyyət və şəkər, xolesterol və qan təzyiqi səviyyəsinə nəzarət etməkdir.

Almaz Həsənli