Baffettin övladları atasının sərvətini necə xərcləyəcəklərinə qərar verə bilmirlər

Uorren Baffettin üç övladı — Syuzi, Hovard və Piter — atalarının sərvətini necə idarə edəcəklərini bilmirlər. Oxuməni. az xəbər verir ki, bu barədə Bloomberg məlumat yayıb.

Vəsaitin ümumi fonda yönəldiləcəyi, yoxsa hər birinin öz payını müstəqil idarə edəcəyi ilə bağlı suala varislərin böyüyü olan 73 yaşlı Syuzan Baffett belə cavab verib: “Bilmirik. Hələlik bilmirik”.

O, Nebraska ştatının Omaha şəhərində yerləşən The Sherwood Foundation xeyriyyə fondunu idarə edir. Syuzinin sözlərinə görə, insanlara fayda vermək imkanı əldə etməsindən məmnundur, lakin eyni zamanda valideynləri qarşısında məsuliyyət hiss edir və hər şeyi düzgün etməlidir.

Sentyabr ayından Berkshire Hathaway şirkətinin direktorlar şurasının sədri vəzifəsini tutan 71 yaşlı Hovard Baffett bir sıra irimiqyaslı layihələrin həyata keçirilməsinə yenidən qayıtmaq niyyətindədir. Ötən ilin sonuna qədər o, Ukraynaya yardım üçün 1,2 milyard dollardan çox, Konqo Demokratik Respublikasına təxminən 167 milyon dollar, Ruandaya 497 milyon dollar, Kolumbiyaya isə daha 287 milyon dollar ayırıb.

68 yaşlı musiqiçi Piter Baffett hələ bir neçə il əvvəl atasına bütün bunlarla heç bir əlaqəsinin olmasını istəmədiyini deyib. Uorren Baffett isə ona “Mən də bunu istəməzdim”, – deyə cavab verib.

“Mən heç kimin milyardlarla dollara sahib olmalı olduğunu düşünmürəm. Bu, sadəcə olaraq, təbiətə ziddir”, – deyə Piter bildirib. O, NoVo Foundation xeyriyyə təşkilatını idarə edir.

Syuzinin fikrincə, əlavə vəsait onun sevimli sahəsinə — uşaqların təhsilinə yönəldilə bilər. Hovard isə Nebraskanın kənd yerlərində səhiyyənin dəstəklənməsi barədə düşünür və Konqo Demokratik Respublikasında sülhün bərqərar olmasına kömək etməyə çalışır. O, şəxsən iştirak edə biləcəyi təşəbbüslərə vəsait ayırmağa üstünlük verir. Hovard Baffett Ukraynaya artıq 20 dəfədən çox səfər edib.

Piter isə şərtsiz əsas gəlirlə bağlı təşəbbüslər üzərində düşünür. Bu konsepsiyaya əsasən, dövlət bütün vətəndaşlarına heç bir şərt qoyulmadan müntəzəm olaraq sabit məbləğdə pul ödəyir.

Bloomberg-in hesablamalarına görə, atalarının sərvətini 20 il ərzində bölüşdürmək üçün, sərvətin hər il 10 faiz artacağı şərti ilə, üç varis birlikdə ildə 17,6 milyard dollar ianə etməli olacaqlar.

Syuzan, Hovard və Piter hər bazar günü telefonla danışırlar. Syuzan Baffett atasına qulluq edilməsinə kömək edir və qardaşlarını baş verənlər barədə məlumatlandırır. İndi onlar vaxtı çatanda atalarının xatirəsini necə əbədiləşdirəcəkləri barədə düşünməyə başlayırlar.

Sentyabr ayında 96 yaşlı əfsanəvi investor Uorren Baffett Berkshire Hathaway şirkətinin direktorlar şurasının sədri vəzifəsindən ayrılıb. Bu vəzifədə onu oğlu Hovard əvəz edib, özü isə fəxri sədr olub. Bununla belə, Uorren Baffett direktorlar şurasındakı yerini qoruyub saxlayıb.

“Bu yaxınlarda ailəm və dostlarımla birlikdə 96 yaşımı qeyd etdim. Onların arasında bir yaşı yenicə tamam olmuş nəticələrimdən biri də var idi. Hazırda o, məndən xeyli sürətlə hərəkət edir”, – deyə Baffett Berkshire səhmdarlarına ünvanladığı məktubda zarafat edib.

Baffett 1965-ci ildən Omahadakı Berkshire şirkətinə rəhbərlik edib. Bloomberg Billionaires Index milyarderlər reytinqində o, onuncu yeri tutur. Onun sərvəti 151 milyard dollar həcmində qiymətləndirilir və bu məbləğin böyük hissəsini Berkshire Hathaway şirkətinin səhmləri təşkil edir.

Almaz Həsənli