Ermənilər cəbhə xəttində atəşkəsi pozarkən zərərsizləşdirilmiş pulemyotçunu mükafatlandırdılar

Ermənistan ordusu mütəmadi olaraq atəşkəs rejimini pozmaqdadır. Bununla belə, qonşu ölkənin rəsmiləri hər bir halda günahı Azərbaycan tərəfinin üzərinə atmağa çalışırlar. Lakin bəzi detallara diqqət yetirdikdə anlamaq olar ki, əslində günah elə Ermənistanın özündədir. Belə ki, işğalçı ölkə mütəmadi olaraq atəşkəs rejimini pozmaqla bölgədə vəziyyətin təhlükəli olduğunu dünya ictimaiyyətinə göstərməyə və beynəlxalq aləmin Azərbaycanı nəzarətdə saxlamağına nail olmağa çalışır.

Tert.am saytının məlumatına görə, bu gün tanınmamış Arsax respublikasının prezidenti Bako Saakyanın fərmanı ilə sıravi Aram Gülnəzəryan ölümündən sonra "Hərbi xidmətlərə görə" medalı ilə təltif olunub. Qeyd edək ki, 19 yaşlı A.Gülnəzəryan pulemyotçu olub. O, 18 iyun tarixində səhər saatlarında Ermənistan ordusunun atəşkəsi pozması nəticəsində yaranan atışma zamanı zərərsizləşdirilib.

Bu isə o deməkdir ki, Ermənistan tərəfi atəşkəs rejimində Azərbaycan mövqelərini iriçaplı silahlardan atəşə tutan əsgərləri təşviq etməklə məşğuldur. Deməli, atəşkəsin pozulması onların işğalçı maraqlarına xidmət edir.

O.M.