Ermənistan hava yolları şirkətini S.Sarkisyanın kürəkəni özəlləşdirir

Son illərdə Ermənistanın iri şirkətlərinin prezident Serj Sarkisyanın kürəkəni (qeyd: prezidentin oğlu yoxdur, 2 qızı var) tərəfindən özəlləşdirdiyi barədə qonşu ölkədə söz-söhbətlər səngimək bilmir. İndi isə ölkənin əsas hava yolları şirkətinin "ailə" tərəfindən özəlləşdirildiyi barədə söhbətlər yayılmaqdadır.

"Armavia" hava yolları şirkətinin sahibi Mixail Baqdasarov panorama.am-a müsahibəsində faktı təkzib etsə də, şirkətin satışa çıxarıldığını etiraf edib: "Deyə bilərəm ki, sizin zəngin fantaziyanız var. Necə istəyirsiniz, elə də qəbul edin. Onlar tamam başqa insanlardır – Avstraliya, İtaliya, Rusiyadan olan şirkətlərdir. Bizdə 3-4 variant var. Bu, kommersiya sirridir. Şirkəti kimsə almayınca bu barədə heç nə deyə bilmərəm, çünki alıcı bizdən küsə bilər. Bizim ölkədə yüksək səviyyədə biznesmen yoxdur ki, bu şirkəti ala bilsin. Bizimkilər hətta təsəvvür edə bilmirlər ki, "Armavia"da dərin biznes proseslər gedir. Rəqəm çox böyük olduğundan onu deyə bilmərəm. Böhrana görə bu addımı atmalı olduq".

O.M.