Mehman Hüseynov: “Qarabağda olduğum illəri unuda bilmirəm. Bir də keçmişim çox pis olub, çətinliklər çəkmişəm”

17 Dekabr 2013 17:34

Bəyəndim (0) Bəyənmədim (0)

- Özünüz haqqında məlumat verərdiniz?

- Mən Hüseynov Mehman 1965-ci ildə iyunun 19-da anadan olmuşam. Əslən Lahıçdanam. Ailədə dörd uşaq olmuşuq - üç qardaş, bir bacı. Bir qızım, bir oğlum var. Oğlum XI sinifdə, qızım isə Rəssamlıq Akademiyasında oxuyur. 16 ildir ki, bu sənətdəyəm.

- Uşaqlıqda necə uşaq olmusan?

- Dəcəl olmuşam. Hər zaman ticarətçi olmaq istəmişəm. Məktəbdə oxuyarkən yay tətilində qarpız satmışam, həvəsim olduğu üçün.

- Tələbələrin varmı?
- Tələbələrim var, çoxdur. Amma öyrənə bilmirlər, çətinlik çəkirlər.

- Necə oldu ki, sizdə kulinariya sənətinə maraq oyandı?
- Uşaqlıqda anam xörək hazırlayanda, onun yanında durub ona kömək edirdim. Gördüm ki, məndə bu sənətə həvəs var və bu sənəti seçdim.

- Sizcə xoşbəxtliyin sirri nədədir?
- İnsan öz gözəlliyinin qədrini biləndə. Əsl xoşbəxtlik ailə xoşbəxtliyidir.

- Bildiyimə görə Milli Kulinariya Assosiasiyasının Prezidenti Tahir Əmiraslanovla münasibətiniz yoxdur. Səbəb nədir?
- Bilirsiniz necədir? Mən assosiasiyasının üzvü deyiləm, ondan irəli gəlir. Amma efirdə onunla birlikdə olanda mənə təklif edib ki, gəl üzv ol assosiasiyaya. Məndə maraq olmayıb. Ona görə məni bəyənmir. Bir də nəyə lazımdır ki, üzv olum.

- Ola bilsin ki, Tahir müəllim sizin əl işinizi bəyənmir?

- Hər şey ola bilər. Hər insanın öz zövqü olur, amma xalqın gözü tərəzidir. Məni bəyənən də var, bəyənməyən də. Ola bilər ki, bəyənmir. Bilmirəm, özündən soruşsanız yaxşı olar.

- Bəziləri əlinə bıçaq və bir soğan alır, deyir ki, mən aşpazam.

- Mən elələrini aşpaz saymıram. Kulinariya bir dəryadır. Şəxsən mən hələ öyrənirəm.

- Qısqanc insansınız?
- Bəli, çox qısqancam.

- İlk məhəbbətiniz olub?
- İlk məhəbbətim olmayıb, simpatiyam olub.

- Bəs həyat yoldaşınızla necə, sevib ailə qurmusunuz?
- Atam ilə Lahıca getmişdim, xalamgilə. Xalam qızını gördüm və bəyəndim, ailə qurduq. Günün bu günü də şükür ki, çox xoşbəxtəm.

- Sevgi nə deməkdir sizin üçün?

- Sevgi həyat və yaşayıb-yaratmaq deməkdir.

- Kimin ifalarına qulaq asırsınız və bəyənirsiniz?

- Röyanın ifasını bəyənirəm. Həm də biz eyni bürcdənik.

- Həyat sizə nə öyrətdi?

- Həyat mənə yaratmağı öyrətdi?

- Sizi nə qıcıqlandıra bilər?
- Yalan vədlər, haqsızlıqlar?
- Boş vaxtlarınızda nə işlə məşğul olursunuz?
- Özümə qapanıb tək olmağı xoşlayıram. Kitab oxuyuram, kulinariya ilə bağlı savadımı artırıram.

- Həyatda nəyi çətinliklə əldə etmisiniz?
- Bu sənətə çətinliklə gəlmişəm.

- Ürəkdən haçan ağlamısınız?
- Anamı itirəndə çox ürəkdən ağladım. (kövrəlir.)

- Axır vaxtlar tez-tez iş yerinizi dəyişirsiniz. Buna səbəb nədir?

- Hamısına şamil etmirəm, restoran müdirlərinin haqsız olmağına görə iş yerimi dəyişirəm.

- Sirr deyilsə, çalışdığınız restoranda gündəlik nə qədər pul qazanırsınız?

- Mən çalışdığım restoranda toydan-toya işləyirəm. Hər toya 100 manat pul alıram. Amma toy edən müştərilər də şirinlik verir. Qiymətlər cürbəcür olur.

- Keçmişə baxanda nə kimi hisslər keçirirsiniz?
- Qarabağda olduğum illər gözümün qarşısından getmir. Bir də keçmişim çox pis olub, çox çətinliklər çəkmişəm.

- İlk məhəbbət güclüdür, yoxsa son məhəbbət?
- Əlbəttə, son məhəbbət.

- Özünüzü daxilən tanıya bilirsiniz?
- Əlbəttə, tanıyıram.

- Şou-bizneslə maraqlanırsınız?
- Qətiyyən yox.

- Kimə bənzəyirsiniz?
- Özüm-özümə bənzəyirəm.

- Qadınlarda ən çox sizi nə cəlb edir?
- Qadın sözü məni cəlb edir?
- Siz də ağıllı qadınlardan qaçırsınız?
- Adam ağıllı qadınlardan qaçmaz. Əksinə, axtarışdayam hər zaman.

- Şəlalə nə deməkdir sizin üçün?
- Şəlalə gözəldir, sevirəm onu. İnsanı uzaqlara, xəyallara aparır. Əsəbləri sakitləşdirir.

- Alın yazısına, bədnəzərə inanırsınız?
- Bəli, çox inanıram.

- Bu sənətdə paxıllığınızı çəkən varmı?
- İnanın, çoxdur, saymaqla qurtarmaz.

- Qəlbinizə nə toxuna bilər?
- Qəlbim çox kövrəkdir, istəmədən hər hansı bir söz qəlbimə dəyə bilər.

- Kişi necə xoşbəxt ola bilər?
- Övladlarının bəhrəsini görəndə kişi xoşbəxt olur.

- Təklikdə qalanda nə və ya kim haqqında fikirləşirsiniz?
- Onda kədərlənirəm, fikirləşirəm ki, həyatda təkəm.

- Sevmək asandır, yoxsa sevilmək?
- Hər ikisi asandır.

- Olubmu səninlə qalmaqal etmək istəsinlər?
- Çox istəyiblər, mən əhəmiyyət verməmişəm.

- Səncə kimin ifası bir nömrədir.

- Hər bir azərbaycanlının mahnısı bir nömrədir.
- Rəqibiniz varmı?
- Rəqibsizəm.

- Fanatınız çoxdur?

- Çoxdur. Çünki sosial şəbəkədən istifadə etdiyimdən bunu hiss edirəm.