Qazaxıstanda Yəsəvinin "Divan-i Hikmət" əsərinin naməlum əlyazması aşkarlandı

Qazaxıstanın Türküstan vilayətində Xoca Əhməd Yəsəvinin daha əvvəl bilinməyən qədim "Divan-i Hikmət" əlyazması tapılıb. Dəyərli artefakt rəsmi olaraq "Köhnə Sultan" Milli Tarix-Mədəniyyət Muzeyinə təhvil verilib.
Oxuməni.az-ın “Yeni Şafak”-a istinadən verdiyi məlumata görə, bu barədə "Yəsəvişünaslıq" elmi mərkəzinin rəhbəri Saypulla Mollakanəğatov mətbuat konfransında bildirib. Onun sözlərinə görə, əlyazması Sauran sakini Ərkin Saparovun təşəbbüsü ilə təhvil verilib. Qədim kitablar uzun illər onun qohumu Əlimcan Ramazanovun ailəsində əcdad irsi kimi qorunub. Tədqiqatlar zamanı mütəxəssislər 17 əlyazma və nadir kitab aşkar ediblər ki, onlardan biri də "Divan-i Hikmət"in daha əvvəl bilinməyən bir nüsxəsi olub.
Ekspertlərin bildirdiyinə görə, əlyazması qalın kağız üzərində yazılıb, üz qabığında xüsusi nişan var və mətn çağatay yazı ənənəsi çərçivəsində ərəb-fars dilindədir. Toplu 120 hikmət ehtiva edir ki, onlardan 39-u elmi ictimaiyyətə əvvəllər məlum deyildi. Qeyd olunur ki, bu kəşf Yəsəvinin irsinin öyrənilməsinə yeni təkan verə bilər.
Xoca Əhməd Yəsəvi XII əsrin görkəmli türk mütəfəkkiri, şairi və sufi təbliğatçısıdır, türk xalqlarının mənəvi mədəniyyətinin formalaşmasına böyük təsir göstərmişdir. O, Yəsəvi sufi təriqətinin banisi hesab olunur və onun "Divan-i Hikmət" əsəri türk-islam ədəbiyyatının əsas abidələrindən biri olmuş, Mərkəzi Asiya ərazisində islam dəyərlərinin yayılmasında mühüm rol oynamışdır.
Almaz Həsənli