ABŞ Ukraynaya hərbi dəstəyi bərpa edib

ABŞ “dərhal” kəşfiyyat məlumat mübadiləsini və Ukraynaya hərbi yardımı bərpa edir. Bu barədə Vaşinqton və Kiyev arasında Ciddədə aparılan danışıqlardan sonra dərc olunmuş birgə bəyanatda deyilir. Ukrayna öz növbəsində ABŞ-ın təklif etdiyi, tərəflərin qarşılıqlı razılığı ilə, habelə Rusiyanın eyni vaxtda razılaşmanı yerinə yetirməsi şərti ilə uzadıla bilən 30 günlük atəşkəslə razılaşır.
ABŞ prezidenti Donald Tramp Ukraynanın təşəbbüsü dəstəklədiyini və Moskvanın razılığına ümid etdiyini bildirib. Dövlət katibi Marko Rubio vurğulayıb ki, qərar Rusiyadan asılıdır. “Biz bu təklifi Rusiyaya çatdırırıq və ümid edirik ki, onlar sülhə razı olacaqlar”, - deyə o, danışıqların uğurunu Trampın səyləri ilə əlaqələndirib.
Səudiyyə Ərəbistanındakı danışıqlar fevralın 28-də Ağ Evdə Tramp və Vladimir Zelenski arasında baş verən ictimai münaqişədən sonra ilk danışıqlar olub. O vaxtdan bəri ölkələr arasında münasibətlər gərgin olaraq qalır, Vaşinqton hərbi dəstəyi və kəşfiyyat mübadiləsini dayandırır, Kiyev isə əsas müttəfiqi ilə əlaqələri bərpa etməyə çalışır.
Almaz Həsənli