Norveç Ukraynaya yardımı təqribən 8 milyard dollara çatdırmağa razılaşıb
Norveç hökuməti əvvəllər Ukraynaya ayrılan 35 milyard krona əlavə olaraq yeni dəstək paketini təsdiqləyib. Beləliklə, bu il Ukraynaya dəstək üçün ayrılan maliyyənin ümumi həcmi 85 milyard Norveç kronu təşkil edir ki, bu da təxminən 7,8 milyard dollardır.
"Biz hərbi dəstəyimizi üç dəfə artırırıq", - bunu Norveçin maliyyə naziri Yens Stoltenberq deyib.
O, əlavə edib ki, vəsait xaricə xərclənəcək və bununla da Norveç iqtisadiyyatına mənfi təsir etməyəcək.
Norveç Rusiyanın Ukraynaya genişmiqyaslı müdaxiləsinin ilk günlərindən Kiyevi fəal şəkildə dəstəkləyir.
Bu müddət ərzində Ukrayna Norveçdən hava hücumundan müdafiə sistemləri, artilleriya, zirehli texnika və raketlər alıb. Norveç həmçinin beynəlxalq fondlar vasitəsilə silah alışını maliyyələşdirir və Rusiyanın hücumlarından sonra onun bərpasını maliyyələşdirməklə Ukraynanın enerji şəbəkəsini gücləndirməyə kömək edir.
Əziz Mustafa, Oxuməni.az
