"Telefonla Həcc qəbul olunmur": ATALAR MİSALI və ekspert rəyi

Kənan Rövşənoğlu: "Borca ziyarətə gedən insanın səfər əsnasında vəfat etməsi mümkündür ki, bu da daha bir günaha səbəb ola bilər"

Azərbaycandan bu il Həcc ziyarətinə gedəcək zəvvarlar üçün ayrılan yerlərdən 250-si boş qalıb. Qafqaz Müsəlmanları İdarəsindən (QMİ) APA-ya verilən məlumata görə, 100 yer VİP ziyarət, 150 yer isə nisbətən zəif şəraitli ziyarət üçün olandır. İdarə sənəd qəbulunun bu ayın sonuna kimi başa çatacağını bildirib və ziyarətə getmək istəyən zəvvarlara tələsməyi tövsiyə edib. QMİ-dən bu il ilk dəfə olaraq zəvvarlara ziyarət xərcini hissə-hissə ödəmək imkanı yaradıldığı da bildirilib. Yəni azərbaycanlı zəvvarlara taksitlə Həcc ziyarəti imkanı təklif edilir.

Qeyd edək ki, əgər adamın imkanı yoxdursa, onun Həcc ziyarətinə getməsi vacib sayılmır. Həcc ziyarətinə borc alaraq, kreditə girərək getmək düzgün hesab edilmir. Həcc ziyarətinə gedənlərin sayında bu il kəskin azalma da müşahidə edilir. Bu il Azərbaycandan gedəcək zəvvarlar üçün say limiti ötən ilkindən az - 1500 nəfər müəyyənləşsə də, sonra bu rəqəm daha da azaldılaraq 1040-a endirilib. Bunun səbəbini çoxları qiymətlərin baha olması ilə izah etsə də, bir sıra şəxslər azalmanın səbəbinin İranla bağlı olduğunu deyir.

Belə ki, İran İrşad və Mədəniyyət Nazirliyi iranlı zəvvarların bu il Həcc ziyarətinə icazə verilməyəcəyini bildirib. İran dövlət radiosu IRINN-a açıqlama verən nazir Cənnəti Səudiyyə yetkililəri ilə keçirdikləri iki görüşdən nəticə alına bilinməməsinin səbəbini rəsmi Riyadın əməkdaşlığa meylli olmaması ilə izah edib: "Təəssüf ki, bu il iranlılar Həccə gedə bilməyəcəklər".

Həcc ziyarətinə gedənlərin azalma səbəblərinə, həmçinin taksitlə Həcc ziyarətinin nə dərəcədə doğru olduğunu öyrənmək üçün QMİ ilə əlaqə saxlamağa çalışsaq da zəngimizə cavab verən olmadı.

Dini ekspert Kənan Rövşənoğlu isə şəriətə görə yalnız imkanı olanların Həcc ziyarətinə getməsinin doğru olduğunu dedi: "Şəriətə görə imkanı olanlar Həcc ziyarətinə getməlidirlər, yəni bu səfərin insana maddi çətinlik yaratmasına Allah razı deyil. Mən, açığı, bilmirəm o hökmü kim verib, amma istənilən halda, hissə-hissə ödəmə də borclanmadır və sabah o adamın bu pulu ödəməmək imkanı, yəni borclu vəziyyətə düşməsi təhlükəsi var. Bu anlamda düşünürəm ki, İslam qanunlarının ruhuna uyğun deyil. Üstəlik, ziyarətə gedən insanın səfər əsnasında vəfat etməsi mümkündür ki, bu da daha bir günaha səbəb olacaq".

Bu il Həcc ziyarətinə gedənlərin sayının azalması məsələsinə gəlincə isə bunun müəyyən problemlərlə bağlı olduğunu deyən K.Rövşənoğlu dinə siyasət müdaxiləsinin olduğunu bildirdi: "Sayın azalmasına gəlincə, bu il Səudiyyə Ərəbistanı və İran arasında anlaşılmazlıq səbəbindən Həcc təşkili mövzusunda problem yaranıb. İranlılar səudiyyəlilərin ağır, yerinə yetirilməsi mümkünsüz olan şərtlər irəli sürdüyünü iddia edir. İstənilən halda bu, dinə siyasət müdaxiləsidir. Həcc ziyarətinin təşkili hansısa dövlətin qanunları və ya siyasi qərarları çərçivəsində məhdudlaşdırıla bilməz. Çünki bu, yeri bir coğrafi məkana aid olsa da, ümummüsəlman ayinidir. Azərbaycanda Həcc zəvvarlarının sayının azalmasının devalvasiya ilə əlaqəli olduğunu düşünürəm.

2009-cu ildə də kvota 6 mindən 2 minə endirildi. Amma sonradan yenidən artırıldı. Azərbaycanlılar hələlik devalvasiyanın travmasını keçirmədikləri üçün bu vəziyyət Həcc ziyarətinə də təsir edib. İkinci mühüm amil bahalıqdır. Doğrudur, indiki qiymətlər bizimlə qonşu Türkiyədəki qiymətlərlə elə də fərqlənmir. Amma Türkiyədə əhalinin maddi durumu, gəlir imkanları Azərbaycandan çox üstündür. Bu səbəbdən də hazırkı qiymətlər belə orta azərbaycanlı üçün Həcc ziyarətini çətinləşdirir. İslam məntiqi ilə yanaşsaq, indi bir azərbaycanlının Həccə getməyib həmin pulu xəstə qohumunu və ya qonşusunu müalicə etdirməsi daha böyük savabdır. Təbii ki, əgər bu məqsədlə Həccə getməkdən imtina edənlər varsa onları da alqışlamaq lazımdır".

Qeyd edək ki, Azərbaycanda Həcc ziyarətinə sənəd qəbulu aprelin 1-dən başlayıb. Ziyarət Azərbaycandan sentyabrın 2-si başlayacaq. Ziyarət zamanı daha yaxşı şəraitli hotellərdə qalmaq, bahalı yeməklərlə təmin olunmaq, o cümlədən hotellərdə 4 nəfərlik otaqlarda yerləşmək 4500 dollar, nisbətən ucuz şəraitli, 6 nəfərlik otaqlarda qalmaq isə 3500 dollardır. Dolların kursuna görə builki ziyarət xərcləri ötən illə müqayisədə təxminən 1000 manata qədər bahadır. Ötən il Azərbaycandan Həcc ziyarətinə 2400 zəvvar gedib, onlardan 3-ü Məkkədə dünyasını dəyişib və orada dəfn olunub. Ötən il həm də Həcc ziyarəti kütləvi insan ölümü ilə nəticələnən hadisələrin baş verməsi ilə də yadda qalıb. Azərbaycanda Həcc ziyarətinə sənəd qəbulunu yalnız QMİ aparır.

Mediainfo.az