Hindistanın baş naziri yeddi ildə ilk dəfə Çinə səfər edəcək
Hindistanın baş naziri Narendra Modi avqustun sonunda yeddi ildən artıq müddətdə ilk dəfə Çinə səfər edəcək. Səfər ABŞ-la münasibətlərdə gərginliyin artması fonunda baş tutacaq. Bu barədə “Reuters” xəbər verir.
Agentliyin mənbəsinin sözlərinə görə, Modi avqustun 31-də başlayacaq Şanxay Əməkdaşlıq Təşkilatının (ŞƏT) sammiti üçün Çinə səfər edəcək.
Modinin səfəri Hindistanın ABŞ ilə münasibətlərinin ABŞ Prezidenti Donald Trampın Asiyada Hindistandan idxal edilən mallara ən yüksək tarifləri tətbiq etməsindən və Yeni Dehlini Rusiya neftini almasına görə əlavə sanksiyalarla hədələməsindən sonra son illərdəki ən pis böhranını yaşadığı bir vaxta təsadüf edir.
Modinin ŞƏT sammitində iştirak etmək üçün Çinin Tianjin şəhərinə səfəri onun 2018-ci ildən bəri Çinə ilk səfəri olacaq. Daha sonra Çin-Hindistan münasibətləri 2020-ci ildə ortaq Himalay sərhədində baş verən hərbi toqquşmadan sonra kəskin şəkildə pisləşdi.
Modi və Çin lideri Xi Jinping oktyabr ayında Rusiyada keçirilən BRİKS sammiti çərçivəsində danışıqlar aparıb və bu, iki ölkə arasında əlaqələrin yaxşılaşmasına səbəb olub. Asiya qonşuları indi Hindistan və Çin arasında işgüzar əlaqələrə və səyahətlərə mane olan gərginliyi yavaş-yavaş azaldır.
Xatırladaq ki, ABŞ prezidenti Donald Tramp Hindistanı Rusiya ilə ticarətinə, eləcə də “istənilən ölkənin ən sərt və ən xoşagəlməz qeyri-tarif ticarət maneələrinə” görə kəskin tənqid etməyə başlayıb.
Əziz Mustafa
