ABŞ məktəbləri tələbələrə dərslərdə iştirak üçün pul ödəməyi qərara alır

Vaşinqtondakı bir məktəb olan Digital Pioneers Academy pilot layihə həyata keçirəcək: 40 orta məktəb şagirdi qiymətindən və davranışından asılı olmayaraq həftəlik 50 dollar alacaq. Bu barədə The Washington Post (WP) yazır.

WP-nin məlumatına görə, ötən il məktəb şagirdlərinin yarıdan çoxu üzrsüz olaraq 10 gündən çox dərs buraxıb. Şəhər rəsmiləri ümid edir ki, əlavə vəsait davamiyyət statistikasını yaxşılaşdıracaq və gənclər arasında cinayətləri azaldacaq.

Təşkilatçılar qeyd edirlər ki, oxşar təşəbbüslər artıq digər məktəblərdə də uğurla həyata keçirilib, məsələn, lisey şagirdlərinin analoji ödənişləri aldığı Yeni Orlean və İndianapolis şəhərlərində. Tennessi və Pensilvaniya Universitetlərinə görə, müntəzəm nağd ödənişlər tələbələrə hər semestrdə əlavə 1,23 gün davamiyyət imkanı verir ki, bu da ildə 20 saat dərsə bərabərdir. Bununla belə, akademik performansda heç bir əhəmiyyətli irəliləyiş müşahidə edilməmişdir.

Məktəblilər aldıqları vəsaitin bir hissəsini qida və zəruri əşyalara, eləcə də hazırlıq kurslarına və sürücülük vəsiqələrinə xərcləyiblər. Valideynlər və uşaqlar bu ödənişlər sayəsində stressin azaldığını bildirdilər. Vaşinqton rəsmiləri bu proqramın öyrənmə motivasiyasını artıracağına və gənclərin cinayətkarlığı ilə mübarizəyə kömək edəcəyinə ümid edirlər. Layihəyə şəhərin müxtəlif məktəblərindən yüzlərlə şagirdin qoşulacağı gözlənilir.

Bundan əvvəl ABŞ son 30 ildə məktəblilər üçün oxu və riyaziyyat üzrə ən pis balları qeydə alıb.

Fevral ayında Ağ Ev bildirmişdi ki, ABŞ-da orta məktəb şagirdlərinin 70%-nin bilik səviyyəsi aşağıdır.

Əziz Mustafa