Azərbaycan BMT-nin Kibercinayətkarlığa Qarşı Konvensiyasını imzalayıb
“TASS” xəbər verir ki, şənbə günü Vyetnamın Hanoy şəhərində beynəlxalq hüquqda əlamətdar sənəd olan BMT-nin Kibercinayətkarlığa Qarşı Konvensiyası imzalanıb.
Oxuməni.az-ın məlumatına görə, tədbirdə BMT-nin Baş katibi Antoniu Quterreş, Vyetnam Prezidenti Lıonq Kuonq, ayrı-ayrı ölkələrin nümayəndə heyətlərinin rəhbərləri, beynəlxalq təşkilatların nümayəndələri və ekspertlər iştirak ediblər.
Azərbaycan Respublikasının Prezidenti İlham Əliyevin müvafiq sərəncamına əsasən, Konvensiyanı Azərbaycan Respublikası adından Dövlət Təhlükəsizlik Xidmətinin rəisi general-polkovnik Əli Nağıyev imzalayıb.
Oktyabrın 25-də sənədi Hanoyda 72 ölkə imzalayıb. Konvensiya 2025-ci ilin sonuna qədər Hanoyda, daha sonra isə 31 dekabr 2026-cı ilə qədər Nyu-Yorkdakı BMT-nin qərargahında bütün BMT üzv dövlətləri tərəfindən imzalanmaq üçün açıq qalacaq.
Qəbul edilmiş konvensiya ölkələrə sürətlə artan kibercinayətkarlıqla mübarizə aparmağa kömək etməlidir. Burada cinayətkarlar terrorizm, insan alveri, maliyyə cinayətləri, narkotik qaçaqmalçılığı və uşaqlara qarşı cinayətlər kimi ağır cinayətlər törətmək üçün texnologiyadan istifadə edirlər.
Sənədi dəstəkləyən ölkələr arasında Azərbaycanla yanaşı, Rusiya, Vyetnam, Belarus, Belçika, Braziliya, Çin, Çexiya, Yunanıstan, Kuba, Şimali Koreya, İrlandiya, Misir, İran, Malayziya, Nigeriya, Polşa, Portuqaliya, Slovakiya, Cənubi Afrika, İspaniya, İsveç, Türkiyə, Birləşmiş Krallıq, Özbəkistan, Venesuela və bir sıra digər ölkələr var. ABŞ, Kanada, Ukrayna və bir sıra Aİ ölkələri də daxil olmaqla altmış ölkə sənədin əleyhinə səs verib.
Almaz Həsənli
