Məcburi köçkün olan sahibkarlara güzəştli kreditlər verilib

Bu gün Sumqayıt şəhərində məskunlaşan Qubadlı rayonundan olan məcburi köçkün sahibkarlara güzəştli kreditlərin verilməsi məqsədilə tədbir keçirilib.

İqtisadiyyat və Sənaye Nazirliyindən apa-ya verilən məlumata görə, 150-dən çox məcburi köçkün sahibkarın iştirak etdiyi tədbir çərçivəsində onlara güzəştli kreditlər hesabına maliyyələşdirilməsi məqsədəuyğun hesab olunan kiçik həcmli tamet, qapı-pəncərə istehsalı sexləri, kağız tullantılarının toplanması və ilkin emalı müəssisəsinin yaradılması üzrə nümunəvi investisiya layihələrinin təqdimatı keçirilib, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilib.

Güzəştli kreditlər hesabına məcburi köçkünlərin məskunlaşdığı ərazilərdə həyata keçirilən layihələr barədə məlumat verən Sahibkarlığa Kömək Milli Fondunun icraçı direktoru Şirzad Abdullayev indiyədək 1 219 məcburi köçkün sahibkara 24,1 mln. manat, o cümlədən 2013-cü ildə 307 məcburi köçkün sahibkara 5 mln. manat güzəştli kredit verildiyini diqqətə çatdırıb. Bu kreditlərin reallaşdırılması məcburi köçkünlərin məskunlaşdığı ərazilərdə 2 000-dən çox yeni iş yerinin yaradılmasına imkan verir.

Tədbir çərçivəsində müvəkkil kredit təşkilatları vasitəsilə Qubadlıdan olan 15 məcburi köçkün sahibkara 202 min manatdan çox güzəştli kredit verilib.