Aviqdor Liberman İran casuslarının işi ilə bağlı

İranın xeyrinə casusluqda ittiham olunan ailə 35 il əvvəl, 1989-cu ildə İsrailə gəlib. Həm də mətbuatın yazdığı kimi “Azərbaycandan” yox, SSRİ-dən. Bu ailədə hər kəs halaxik yəhudidir (qadın əcdadları hamısı yəhudi olan şəxs). Bunu İsrail mətbuatına müsahibəsində İsrailin keçmiş müdafiə və xarici işlər naziri, “Bizim evimiz İsrail” partiyasının rəhbəri Aviqdor Liberman deyib.

Onun sözlərinə görə, “casus şəbəkəsi”nin rəhbərinin İsrailə repatriasiyası zamanı cəmi 8 yaşı olub və o, İsraildə böyüyüb. Qrupun digər üzvləri İsraildə doğulublar. Buna görə də, bu hekayəni keçmiş SSRİ-dən olan mühacirlərin bütün icmasına köçürmək düzgün deyil, Liberman bildirib.

İrana casusluq keçmişdə dəfələrlə İsraildə baş verib və bütün hallarda səbəb bir şey olub: pul. Bunun arxasında heç bir ideologiya yoxdur. Söhbət pulun vəsvəsəsinə tab gətirə bilməyən insanlardan gedir.

O qeyd edib ki, İrana casusluq indiki müharibədən əvvəl və hətta müharibə zamanı baş verib.

Xatırladaq ki, bir neçə gün əvvəl İsrail hakimiyyəti İranın xeyrinə casusluq ittihamı ilə 7 nəfəri həbs etmişdi. Eyni zamanda onların Azərbaycandan gəldikləri də göstərilib. Məlum olub ki, bu şəxslərdən yalnız biri sovet dövründə Azərbaycanda doğulub və milliyyətcə yəhudi olub.

Almaz Həsənli