Norveçdə "rus casus balinası"-nin güllələnərək öldürüldüyü ehtimal olunur

Norveçdə Hvaldimir adlı "rus casus balinası" ölü tapılıb və onun açılan atəş nəticəsində
öldürüldüyü ehtimal edilir, "The Guardian" “OneWhale” və “NOAH” heyvanların müdafiə
təşkilatlarının bəyanatlarına istinadən yazır. Onlar təcili araşdırma aparılmasını tələb edirlər.
“Bir çox baytarlar, bioloqlar və ballistik ekspertlər foto sübutları, o cümlədən Hvaldimirin
xəsarətlərinin ətraflı təsvirlərini təhlil etdilər. Heyvan müdafiəçisi fəallarının verdiyi açıqlamada
onların tapıntıları balinanın ölümünün dərhal polisin müdaxiləsini tələb edən cinayət əməlinin
nəticəsi ola biləcəyini göstərir.
Balina cəsədinin tədqiqində iştirak etdiyini söylədiyi “OneWhale” şirkətinin rəhbəri Regina
Krosbİ Hauq “AFP”-yə bildirib ki, Hvaldimirin bədənində çoxsaylı güllə yaraları var. “NOAH”-
ın rəhbəri Siri Martinsen əlavə edib ki, "balinanın aldığı xəsarətlər çox narahatedicidir və cinayət
əməlinin əlamətlərinə malikdir, bu, son dərəcə şok edicidir".
“NBC News” xəbər verir ki, balina üzərində yarılma əməliyyatı hələ də davam edir və yekun
qiymətləndirmə üç həftəyə qədər çəkə bilər.
İlk dəfə 2019-cu ildə Norveçin Finmark bölgəsində Hvaldimir (norveçcə hval - “balina”) ləqəbli
beluqa balinası aşkar edilib. Heyvan hərəkət kamerası quraşdırmaq üçün uyğun qoşquda olub.
Onun üzərində Rusiyanın “Sankt-Peterburq Avadanlıq” şirkətinin loqosu olub. Bütün bunlar
balinanın “Rus casusu” olması ilə bağlı fərziyyələrə səbəb olub. Rusiya hakimiyyəti bu cür
ehtimalları şərh etməyib.
Norveç Balıqçılıq idarəsində balinanın bir müddət əsirlikdə saxlandığını hesab edirlər: o, özünü
insanlara öyrəşmiş kimi aparırdı. Balinaınn cəsədi sentyabrın 2-də ölkənin cənubundakı
Risavika körfəzində tapılıb. Hvaldimirin təxmini ölüm yaşı 15 ilə 20 il arasında idi, bu, 40 ilə 60
il arasında yaşaya bilən Beluqa balinaları üçün nisbətən azdir.
Almaz Həsənli