Gürcüstan parlamentinin sədri “LGBT təbliğatını” qadağan edən qanunu imzalayıb

Gürcüstan parlamentinin sədri Şalva Papuaşvili “Ailə dəyərləri və yetkinlik yaşına çatmayanların müdafiəsi haqqında” qanunu imzalayıb. Bu barədə spiker öz Facebook səhifəsində məlumat verib.

“Mənim imzaladığım qanun indiki, müvəqqəti, dəyişən ideya və ideologiyaları əks etdirmir, sağlam düşüncəyə, tarixi təcrübəyə və çoxəsrlik xristian, gürcü və Avropa dəyərlərinə əsaslanır”, - deyə müraciətdə bildirilir.

Oktyabrın 2-də Gürcüstan prezidenti Salome Zurabişvili qanunu imzalamayıb və ona veto qoymayıb. Gürcüstanın Birinci Kanalının qeyd etdiyi kimi, bu halda sənəd beş gün ərzində parlamentin spikeri tərəfindən imzalanmalı idi.

Qanun parlamentin müzakirəsinə ölkənin hakim “Gürcü arzusu” partiyası tərəfindən təqdim edilib. Üçüncü oxunuşda onu 84 deputat dəstəkləyib, müxalifət isə səsvermədə iştirak etməyib.

Qəbul edilmiş qanun eynicinslilərin nikahını, eynicinsli cütlüklər tərəfindən uşaqların övladlığa götürülməsini və transgender keçidini qadağan edir. Həkimlərə transseksual keçidi asanlaşdıran əməliyyatlar və digər manipulyasiyalar etmək qadağandır. Bundan əlavə, təhsil müəssisələrində və kütləvi informasiya vasitələrində eynicinsli münasibətlərin “populyarlaşdırılmasına” yönəlmiş məlumatların reklamı və yayılması qadağandır. Qanuna görə, yalnız kişi və qadın rəsmi nikah bağlaya bilər.

Oxuməni.az