Bolqarıstanın baş naziri Ukrayna ilə təhlükəsizlik sazişi imzalamaqdan imtina edib

Bolqarıstanın Texniki Hökumətinin Baş naziri Dimitar Qlavçev parlamentin əvvəlcədən razılığı olmadan Ukrayna ilə təhlükəsizlik sazişi imzalamaqdan imtina edib. Baş nazir bunu Brüsseldə Aİ sammitinə gələrkən Bolqarıstan Milli Televiziyasına müsahibəsində bildirib.

“Əgər GERB (Bolqarıstanın Avropa İnkişafı Uğrunda Vətəndaşlar Partiyası) sazişi dəstəkləməsə və ya təklif səs çoxluğu toplamasa, o zaman mən onu imzalamayacağam, bu məsuliyyəti öz üzərimə götürə bilmərəm”, - deyə Qlavçev bildirib.

Bundan əvvəl Qlavçev parlament üzvlərindən Ukrayna ilə təhlükəsizlik sazişi imzalamaq üçün mandat istəyib. Bu barədə hökumətin mətbuat xidməti məlumat yayıb.

“Parlament idarəçiliyi ruhunda, sazişin müddətini (10 il) nəzərə alaraq, Xalq Məclisini hökumətə Bolqarıstan və Ukrayna arasında təhlükəsizlik sahəsində əməkdaşlıq haqqında saziş imzalamaq üçün mandat verməyə çağırıram”, - məktubda deyilir. Həmçinin qeyd olunub ki, saziş müqavilələr hüququ üzrə Vyana Konvensiyasına aid deyil və ölkə parlamentinin qərarlarına uyğun olaraq siyasi öhdəlikləri nəzərdə tutur. Aİ-nin 27 ölkəsindən yalnız Avstriya, Bolqarıstan, Kipr, Malta, Slovakiya və Macarıstanın sazişi imzalamadığı vurğulanıb.

Oxuməni.az