Hindistanlı milyarder Ratan Tata vəfat edib

Milyarder və Hindistanın “Tata Group” korporasiyasının direktorlar şurasının keçmiş sədri Ratan Tata 86 yaşında vəfat edib. Bu barədə şirkətin saytında məlumat verilir.

Bəyanatda deyilir: “Dərin itki hissi ilə əvəzsiz töhfələri təkcə Tata Qrupunu deyil, həm də millətimizin quruluşunu formalaşdıran həqiqətən qeyri-adi lider olan Ratan Naval Tata ilə vidalaşırıq”.

“Mükəmməlliyə, dürüstlüyə və innovasiyaya sarsılmaz sadiqliyi ilə onun rəhbərliyi altında Tata Qrupu öz əxlaqi prinsiplərinə həmişə sadiq qalaraq qlobal varlığını genişləndirdi. Tatanın xeyriyyəçilik və cəmiyyətin inkişafına sadiqliyi milyonlarla insanın həyatına toxunub. Təhsildən tutmuş səhiyyəyə qədər onun təşəbbüsləri gələcək nəsillər üçün faydalı olacaq dərin iz buraxıb”, - Tata Qrupunun bəyanatında deyilir.

Ratan Tata 28 dekabr 1937-ci ildə anadan olub. Hindistanın nüfuzlu Tata ailəsindən idi. O, 1990-2012-ci illərdə Tata Qrupuna sədrlik edib və 2016-cı ilin oktyabrından 2017-ci ilin fevralına kimi şirkətin müvəqqəti sədri olub.

Tata Group 1868-ci ildə yaradılıb və Hindistanın ən böyük şirkətlərindən biridir. O, informasiya texnologiyaları, energetika, maşınqayırma, material və kimya istehsalı sahəsində çalışır.
Əziz Mustafa