Çin, Yaponiya və Cənubi Koreya ABŞ-ın tariflərinə birgə cavab verəcək

Çin, Yaponiya və Cənubi Koreya ABŞ-ın tariflərinə bu həftə birgə cavab verməyə razılaşıb.

Üç Asiya ölkəsi bazar günü son beş ildə ilk dəfə olaraq ədalətli ticarəti dəstəkləməyə və öz aralarında iqtisadi əlaqələri gücləndirmək barədə razılığa gəlib. Bu, ABŞ-ın bütün ticarət tərəfdaşlarına tarifləri elan etməsindən bir neçə gün əvvəl baş verir.

Reuters agentliyi Weibo istifadəçisinə istinadən yazır ki, Yaponiya və Cənubi Koreya Çindən yarımkeçirici xammal idxal etməyə can atırlar, Çin isə Yaponiya və Cənubi Koreyadan çiplər almaqda maraqlıdır.

Agentlik qeyd edir ki, Pekin, Seul və Tokio Birləşmiş Ştatların əsas ticarət tərəfdaşlarıdır, baxmayaraq ki, onlar arasında ərazi mübahisələri və Yaponiyanın zədələnmiş Fukusima AES-dən dənizə su buraxması da daxil olmaqla, bir sıra məsələlərdə fikir ayrılığı var.

Bu arada CNN xatırladıb ki, çərşənbə günü Tramp xarici ölkələrin ABŞ-a tətbiq etdiyi tariflərə uyğun geniş tariflər tətbiq edəcəyini bildirib. Üstəlik, o qeyd edib ki, Cənubi Koreya kimi müttəfiqlər kənarda qalmayacaq.

"Cənubi Koreyanın orta tarifi dörd dəfə yüksəkdir. Fikir verin: dörd dəfə yüksəkdir. Biz Cənubi Koreyaya bu qədər hərbi və bir çox başqa formada yardım edirik, amma baş verənlər budur", - Tramp martın əvvəlində Konqresdəki çıxışı zamanı deyib.

O, həmçinin Çinlə ticarət gərginliyini yenidən alovlandırdı və ölkəyə ilk səlahiyyət müddətində tətbiq edilən tariflərin üstünə 20% tariflər tətbiq etdi. Bununla belə, Çin tez bir zamanda ABŞ-dan toyuq, buğda, qarğıdalı və pambıq idxalına 15% rüsum tətbiq etməklə cavab verdi.

Əziz Mustafa, Oxuməni.az