Tanışını güllələyənə 9 il cəza

Bakı Ağır Cinayətlər Məhkəməsində Sabunçu rayon sakini Elxan Cəfərovun (1967-ci il təv.) CM-nin 120.1-ci (qəsdən adam öldürmə) və 228.1 (qanunsuz olaraq odlu silah əldə etmə, saxlama və ya satma) maddələri ilə təqsirləndirilməsinə dair cinayət işi üzrə məhkəmə prosesi yekunlaşıb.

Məlumatı görə, ötən il iyulun 18-də Nardaran qəsəbəsində Elxan Cəfərov şəxsi münasibətlərin aydınlaşdırılması zəminində ov tüfəngindən atəş açaraq qəsəbə sakini Süleyman Nuruzadəni ağır yaralayıb. Sonuncu 3 saylı klinik xəstəxanasına çatdırılarkən kəskin qanitirmədən dünyasını dəyişib. Daxil olan məlumat əsasında cinayəti törədən şəxs Sabunçu RPİ 14-cü polis bölməsinin əməkdaşları tərəfindən saxlanılıb və istintaqa təqdim edilib, ondan cinayətin aləti hesab olunan 16 kalibrli sənədsiz ov tüfəngi götürülüb.
Məhkəmə prosesində E.Cəfərov ittiham üzrə özünü təqsirli hesab edib. O, cinayəti özünə qarşı işlədilən təhqirlərə cavab olaraq törətdiyini bildirib və açıqlama verməkdən imtina edib.
Məhkəmənin hökmü ilə təqsirləndirilən şəxs cəzasını ciddi rejimli cəzaçəkmə müəssisəsində çəkməklə 9 il müddətinə azadlıqdan
məhrumetmə cəzasına məhkum olunub.

Mediainfo.az