Rusiya Əmək Nazirliyi 2026-cı ildə tikinti, ictimai iaşə və bir sıra digər sektorlarda əcnəbilərin işə götürülməsini məhdudlaşdırmağı təklif edir

Rusiyanın Əmək Nazirliyi hökumətə 2026-cı ildə bir sıra sənaye sahələrində işəgötürənlərin əcnəbiləri işə götürmək imkanlarını azaltmağı təklif edib. Müvafiq qərar layihəsini departament normativ akt layihələrinin Federal Portalında dərc edib. Bu barədə "Kommersant" yazır.

Jurnalistlərin izah etdiyi kimi, Rusiya hökuməti hər il işçilərin ümumi sayında xarici vətəndaşların icazə verilən payını müəyyən edir. Qərar layihəsindən göründüyü kimi, ən böyük azalma ilə iaşə sektoru üzləşəcək. Əgər əvvəllər əcnəbilərin işə götürülməsində heç bir məhdudiyyət yox idisə, 2026-cı ildə belə şəxslər iş yerlərinin yalnız 50%-ni tuta biləcəklər.

Tikinti sektorunu da əhəmiyyətli azalma gözləyir. Əmək Nazirliyi əcnəbi işçilərin payını 80%-dən 50%-ə endirməyi təklif edib.

"Kommersant" yazır ki, alkoqol və tütünün pərakəndə ticarətində Əmək Nazirliyi kvotanı 15%-dən 0%-ə endirməyi təklif edir ki, bu da faktiki olaraq işəgötürənlərin bu işlərə əcnəbiləri işə götürməsinə qadağa deməkdir.

"Çox güman ki, biz Mərkəzi Asiyadan miqrasiyanın qarşısını almaq və eyni zamanda, uzaq xarici ölkələrdən işçi axınını artırmaq cəhdini görürük," - RANEPA-nın Sosial Təhlil və Proqnozlaşdırma İnstitutunun aparıcı elmi işçisi Yuliya Florinskaya "Kommersant"la söhbətində bildirib.

Miqrantların uşaqları üçün məktəblərdə ödənişli təhsil haqqında qanun layihəsi avqustun əvvəlində Dövlət Dumasına təqdim edilib. Deputatlar ödənişli təhsillə yanaşı, rus dili üzrə imtahandan keçmək üçün pulsuz cəhdlərin sayının üçlə məhdudlaşdırılmasını təklif edirlər.

Qanun layihəsinin izahatında deyilir ki, “Rusiya məktəblərində miqrantların sayının artması onlarda yer çatışmazlığına səbəb olur”. Rus dilini bilməmək isə Rusiya vətəndaşlığı olan tələbələrin öyrənmə prosesini ləngidir.

Almaz Həsənli