Böyük Britaniyanın müdafiə naziri Ukraynaya qoşun göndərməyə hazır olduğunu təsdiqləyib

Böyük Britaniyanın müdafiə naziri Con Gili müharibə bitdikdən sonra Ukraynaya qoşun göndərmək planlarını təsdiqləyib. Lakin o, təhlükəsizlik problemlərini əsas gətirərək təfərrüatlar barədə danışmaqdan imtina edib.

Gili bunu Kiyevdə mətbuat konfransı zamanı RBC-Ukrayna müxbirinin sualına cavab verərkən deyib.

Gili Britaniyanın baş naziri Keir Starmerin Britaniyanın qoşun göndərməyə hazır olması barədə bəyanatını təsdiqləyib. Onun sözlərinə görə, bu, Ukraynada müharibə bitəndə baş verəcək.

Gili əmin etdi ki, planlar və öhdəliklər mövcuddur. Onlar Ukraynaya təyyarə, gəmi və ya quru qoşunlarının göndərilməsinə aiddir.

"İcazə verin sizi əmin edim ki, təyyarələrin, gəmilərin və ya qoşunların göndərilməsi ilə bağlı bu planlar və öhdəliklər əhəmiyyətli və realdır. Biz sülhün mümkün olduğuna inanırıq və bu sülh gələndə hazır olmalıyıq", - deyə nazir yekunlaşdırıb.

Xatırladaq ki, daha əvvəl Ukrayna prezidenti Vladimir Zelenski söz vermişdi ki, bu həftə Ukrayna öz tərəfdaşları ilə birlikdə yazılı təhlükəsizlik zəmanəti hazırlayacaq. Əsas platforma artıq mövcuddur - Zelenski bu yaxınlarda Ukrayna üçün təhlükəsizlik zəmanətlərinin üç əsas blokunu elan etdi. Söhbət ordunun saxlanılmasından, NATO ölkələri ilə əməkdaşlıqdan və Rusiyaya qarşı sanksiyalardan gedir.

Əziz Mustafa