Disney və TikTok striminq gəlirlərinin artması fonunda müqavilə imzalayıb

"The Walt Disney Company" korporasiyası və TikTok sosial şəbəkəsi birgə kontent istifadəsi ilə bağlı genişmiqyaslı müqavilə imzalayıblar. Tərəfdaşlıq çərçivəsində ABŞ-dakı bloqerlər Marvel, Pixar, Star Wars və FX franşizaları da daxil olmaqla, yüzlərlə film və serialın materiallar kitabxanasına rəsmi çıxış əldə edəcəklər. Oxuməni az xəbər verir ki, bu barədə "ChannelNews" məlumat yayıb.

İstifadəçilər tərəfindən yaradılan qısa videolar təkcə TikTok-da deyil, həm də Disney+ striminq xidmətinin özündə, "Verts" adlı xüsusi şaquli video bölməsində yayımlanacaq. "Disney Creator Ambassador Program" birgə proqramı çərçivəsində ən yaxşı müəlliflər eksklüziv tədbirlərə çıxış və tanıtım imkanları əldə edəcəklər.

TikTok-un daxili məlumatlarına görə, istifadəçilər hər gün kino və seriallar haqqında milyonlarla post paylaşırlar və tamaşaçıların demək olar ki, yarısı yeni şouları məhz sosial şəbəkələr vasitəsilə kəşf edir.

Sövdələşmə Disney-in üçüncü rüb üzrə maliyyə hesabatının dərc olunması ilə eyni vaxta təsadüf edib. Şirkətin striminq istiqaməti üzrə əməliyyat mənfəəti ötən illə müqayisədə iki dəfə artaraq 712 milyon dollara çatıb.

Tərəfdaşlıq əvvəlcə ABŞ-da başlayacaq, daha sonra isə şirkətlərin planlarına əsasən digər bazarlara da yayılacaq.

Bu sövdələşmə təkcə qısa videoların artan təsirini və "Pew Research Center"-in məlumatına görə, ABŞ-da artıq 200 milyon istifadəçi həddini keçən TikTok-un davamlı populyarlığını deyil, həm də auditoriyanın cəlb edilməsində fan-cəmiyyətlərin və kontent müəlliflərinin gücünün etiraf edildiyini təsdiqləyir.

Sövdələşmə həmçinin Disney-in ötən il Mikki Maus və Lyuk Skayuoker kimi personajları süni intellekt şirkəti olan OpenAI-ın "Sora" video-generasiya alətinə inteqrasiya etmək üçün 1 milyard dollar sərmayə qoyacağı barədə elanını xatırladır.

Üçüncü tərəfə Disney-in intellektual mülkiyyət obyektlərindən istifadə etməyə icazə verən üçillik müqavilə, OpenAI-ın bu alət vasitəsilə yaradılan irqçi və zorakılıq ehtiva edən kontentə görə kəskin tənqidlərdən sonra "Sora"nı bağlamaq qərarından sonra pozulmuşdu. Hollivudda bir çoxları bu nəticəni alqışlamışdı, çünki "Sora" yaradıcı sənaye, eləcə də intellektual mülkiyyətin qanuni istifadəsi üçün təhdid kimi qəbul edilirdi.

Almaz Həsənli